Durante conferencia di Prensa yama pa Asociacion Trabou di Hubentud na Aruba (ATHA) y
comision organisatorio di Proyecto Poder di Hubentud; Director di ATHA Sra. Franchesca
Heinze a elabora cu e aña aki e proyecto ta uno special pa celebra na grandi mirando cu ta
e di 10 edicion di Poder di Hubentud.
A scoge como tema central e palabra “BIB’E” di cual lo tin un programa special cu
diferente seminario interesante pa e hoben por biba un experiencia inolvidabel na unda tur
talento, cu kisas ta scondi, por ser descubri pa pone tur nan podernan den practica na
beneficio di nos comunidad.
Lyonel Dirksz a keda apunta pa e Directiva di ATHA como coordinador general di e proyecto
pa su añanan di dedicacion y conocimiento pa organisa diferente evento.
ATHA ta convenci cu Lyonel y e comision nobo lo por haci un trabou sublime e aña aki.
A crea un comision central cu ta consisti di Franchesca Heinze, Lyonel Dirksz, Jhon Freddy
Montoya di Departamento di Cultura Aruba, Adeline Trimon-Geerman, Jeremy Wever,
Finelaine Tromp, Julia Geerman, y Arthur Arends cu lo carga e proyecto hunto cu un subcomision di hoben cu a participa den edicionnan anterior di “Poder di Hubentud”.
Lyonel Dirksz a elabora con pa nomina un hoben:
Algun dia pasa a cuminsa informa directamente na diferente organisacion social, cultural,
deportivo, entre otro, pa nomina un hoben di edad di 14 te cu 17 aña cu a destaca
grandemente den nos comunidad entre e periodo di janurai 2023 te cu awor.
Pa nomina un hoben por busca e link cu ta aparece riba Facebook di ATHA y di Poder di
Hubentud y e ta dura solamente algun minuut pa yena e informacionan cu datonan di e
hoben.
Tur nominado lo pasa den un proceso di seleccion y lo escoge e grupo di hoben cu mas a
resalta y cu pa nan valioso trabao, lo ricibi un reconocimiento special cu lo brinda e
oportunidad directo pa biba e experencia di Poder di Hubentud 2024.
Adicionalmente, e aña aki tur hoben cu ta haciendo un tremendo trabao den nos
comunidad y cu kier participa, por inscribi nan mes pa participa den e proyecto.
Mester bay riba e link indica riba ATHA su Pagina di Facebook y yena tur informacion pa
forma parti protagonico di trayecto di e Proyecto Educacional: “Poder di Hubentud 2024”.
Comision a traha riba un programa cu un trayecto interesante y varia, cu lo ser ehecuta di
un forma dinamico pa e hobennan haya informacion valioso riba diferente tema, entre otro
di desaroyo personal, con pa traha den ekipo, con pa crea un proyecto, con pa ehecuta un
proyecto y finalmente mester convence un hurado cu nan proyecto merece di ta e ganado.
E trayecto lo tuma luga den vakantie grandi y lo finalisa cu un Youth Fest den The Venue
Club pa celebra 10 aña di Poder di Hubentud, clausura di vakantie grandi, ganado di e
proyecto edicion 2024 y celebracion di e di 10 aña di Poder di Hubentud, cual evento lo ta
uno gratis cu participacion di diferente DJ hoben popular den nos comunidad.
Durante di e trayecto, tur participante mester crea un evento special ‘Youth Fair’ di cual
comunidad por ta parti di e proyecto aki, mas informacion lo keda presenta despues den
un comunicado di prensa.
Asociacion Trabou di Hubentud na Aruba ta invita tur organisacion pa inscribi un hoben
excepcional prome cu diahuebs 27 di juni 2024 pa 12’or di merdia.
Klik aki bou y yena bo formulario y participa
