Kuerpo Polisial Hulanda Karibense, huntu ku Polis Hulandes i INTERPOL, a hasi un paso grandi den nan kolaborashon internashonal. E akuerdo ta sòru pa e islanan Boneiru, Sint Eustatius i Saba, awor via e kontakto direkto ku INTERPOL, ta den kontakto ku e sede prinsipal na Lyon i ku koleganan polisial kasi rònt mundu. Dor di esaki koleganan polisial di KPCN mes por konsultá i suministrá e banko di dato di INTERPOL i asina interkambiá informashon rònt mundu di un manera seif.
INTERPOL ta un organisashon mundial na kua tin 194 estado miembro afiliá.
Kada estado miembro tin un Ofisina Sentral Nashonal (NCB). E NCB ta mantené komunikashon ku e ofisina prinsipal i ku e otro NCB nan i ta e ‘single point of contact’ pa e servisionan di mantenshon. Na Hulanda esaki ta e NCB The Hague, kual ta akomodá na e ‘Landelijk Internationaal Rechtshulp Centrum’(LIRC). Aworakí ta habri un sup-NCB na Hulanda Karibense pa promé biaha. E sup-NCB aki ta kai bou di responsabilidat di NCB The Hague.
E deseo pa un sup-NCB pa Hulanda Karibense tabata eksistí ya kaba pa basta tempu serka KPCN. Hefe di Kuerpo Interino, Ronald Zwarter i Melvin Sint Jago, komo hefe di e departamento di informashon di KPCN, a traha den kordinashon ku INTERPOL NCB The Hague na e realisashon real.
E islanan Hulanda Karibense ainda no tabatin un konekshon direkto ku dato di INTERPOL. Dor di esaki nos no por a ehekutá búskeda direkto di personanan”, Melvin ta splika. ‘Pa nos haña informashon pa ku kriminalnan tin biaha nos tabata dependé di hopi partidonan eksterno. Dor di establesé nos propio sup-NCB, a saka un stap for di e proseso aki i naturalmente esaki ta promové e rapides i ku esaki ta mehorá e rastreo internashonal’.
‘Ku e konekshon ku INTERPOL aki nos por señalá kriminal, terorista i otro personanan indeseá òf gruponan kriminal mas rápido i atendé ku nan di forma mas efektivo i hasiendo esaki, hasi tantu e parti Karibense di Reino komo Hulanda oropeo ainda mas seif’. Segun Jose Rosales, hefe di Kuerpo di KPCN.
Kontakto ku INTERPOL
Koleganan di intel di Kuerpo Polisial Hulanda Karibense spesial di trein lo bai traha dentro di e sup-NCB. Nan ta forma e konekshon entre INTERPOL, NCB The Hague i e servisionan di mantenshon na e islanan di Hulanda Karibense, Boneiru, Sint Eustatius i Saba. Pa futuro e ambishon ta pa oumentá e aksesibilidat di INTERPOL na pòstnan di frontera na Hulanda Karibense, pa asina Koninklijke Marechaussee por interogá pasahero entrante i saliente via e banko di dato di INTERPOL.
