Den cuadro di e intento di Gabinete Pisas II pa reduci gasto den salubridad publico a scoge entre otro pa baha gasto di remedinan dor di mishi cu potmoni di pueblo. Den pasado na inicio di pais Corsou autonomo tambe a tuma pasonan pa baha gasto di remedinan cu 30 miyon florin.
Na 2011 a dicidi pa maximalisa e prijs di remedinan di marca y inicia introduccion di remedinan generico y mas barata. Awor 12 aña despues aseguradonan di SVB ta wordo sorprendi cu un pago adicional riba nan remedinan, hasta ora nan ta remedinan generico, anto esaki banda di e 1 Florin di “eigen bijdrage”riba e recepetenregel. P’esei Fraccion di MAN ta di opinion cu mester cambia e maneho mara na introduccion di remedi generico y prijs maximo di e remedinan di marca pa cu reduccion di gastonan di remedi.
Introduccion di un sistema di destaho publico di e remedinan cu tin mas peso financiero pa SVB por resulta cu por haña remedinan di marca original hasta mas barata cu esun nan generacionnan cu tin riba mercado.
Cu esaki por tin un preis fiho di e remedinan pa 2 aña / 1 aña por garantisa cu e asegurado no mester paga extra y tambe baha gasto di SVB considerablemente. E practica aki ya pa años ta wordo haci na entre otro Barbados, Bahamas, Trinidat & Tobago, Jamaica y Sint Maarten pa controla gasto di remedi.
Fraccion di MAN ya pa hopi tempo a tuma nota di e dificultad cu pa hopi asegurado di SVB tin pa paga hasta e un florin pa cada remedi for di nan propio cartera y a boga na cada un di e ministernan di Salud di e ultimo añanan pa elimina e 1 florin pa esunnan di menos recurso, entre otro pa esunnan ku ta biba di onderstand y nos pensionadonan ku tin solamente un AOV como entrada.
Awor cu costo di bida a subi drasticamente como consecuencia di e inflacion despues di e pandemia di Covid, e gobierno actual di MFK y PNP ke pa e asegurado di SVB paga un asina yama “bijbetaling “ cu hopi biaha ta mucho mas cu e 1 florin pa cada remedi.
E ta bisto cu esaki lo redunda den aseguradonan cu lo no por tuma nan remedinan y principalmente esunnan cu malesanan cronico manera malesa di sucu, presion , colesterol , curason y esunnan cu ta uza remedi pa tene sanger delega. E personanan aki lo no por paga y consecuentemente nan lo no por uza nan remedinan diario. Esaki lo conduci na mas problema cu nan salud y lo aumenta complicacionnan cu ta exigi pa interna e personanan aki den hospital CMC cu ta resulta mas gasto.
Ta como sifuera cu Gabinete Pisas II ku su minister di Salud, Medio Ambiente y Naturalesa , den persona di Sr. Javier Sylvania, ta empeña pa scapa gasto di remedi riba lomba di pueblo di un forma cu lo causa problema di mas gravedad pa salud di e poblacion di Corsou y finalmente netamente un aumento di gasto den salubridad.
Na Ingles nos lo bisa cu e gobierno actual ta “ Penny wise and Pound foolish”, nan lo scapa un depchi awe pa gasta un florin mañan.
Mientras cu ainda’ despues di dos aña, e Gobierno actual no por presenta ningun plan pa atende cu prevenshon di malesa.
Fraccion di MAN ta aplaudi e echo cu tin botica cu a demostra solidaridad for di principio cu e aseguradonan u nunca a cobra e 1 florin pa cada remedi.
Tambe tin otro boticanan ya no ta cobrando e florin na aseguradonan di edad 60 plus. Ohala cu tur botica por sigui e ehempel aki!
Fraccion di MAN ta suplica pa draai bek e “ bijbetaling “ aki riba remedinan generico , mescos cu a haci riba esun di vitamina despues cu Fraccion di MAN a condena esaki .
Nos ta urgi e Gobierno, SVB y profesional den area di remedi pa trece otro alternativanan pa control di gasto den e fondo di salubridad publico cu lo no perhudica e salud y calidad di bida di nos pueblo y cuminsa traha riba prevenshon di nos pueblo.
- Kico ta e motibo cu awor banda di e 1 florin pa cada remedi, e asegurado di SVB mester paga “extra bijdrage “ pa remedinan generico ?
- E decision na 2011 pa introduci generico no tabata pa baha gasto ?
- Ta bay bini un investigacion di e efectividad di e maneho aki di 2011 en bista cu awe tog e asegurado mester paga extra pa remedinan generico ?
- Cuanto botica no ta cobra e receptenregel aki ?
- A haci un investigacion di efectividad medico di salud riba introduccion di 1 florin riba e pueblo seguro na SVB ?
- Gobierno ta mira e posibilidad pa introduci un sistema di destaho publico hunto cu SVB di remedinan mas uza pa e diferente malesanan ?