ORANJESTAD,Aruba
Cumpliendo cu reglanan existente di stacionamento den Centro di Oranjestad
Orario di stacionamento paga cu ta vigente te cu proximo aviso ta di 9’or di mainta te cu 3’or di atardi, di dialuna pa diasabra. E orario aki ta stipula specificamente pa vaknan blanco.
Vaknan geel ta destina exclusivamente pa individuonan den posecion di un permiso di parkeo di pago mensual otorga pa Aruparking, y ta valido pa un area specifico. Locual ta nificia cu un persona cu tin permiso pa, por ehempel, zona A no por parkeer den vak geel den zona B. Si un persona cu tin permiso pa un zona specifico dicidi di parkeer den un otro zona den centro di ciudad, lo mester haci uzo di un vak blanco.
Reglanan general di stacionamento den Centro di Oranjestad
Reglanan general di stacionamento den Centro di Oranjestad ta keda vigente. Esaki ta mas tanto pa garantisa ordo y organisacion ora di staciona den centro di Oranjestad.
Aruparking lo bay over na kita un auto for di un area na momento cu:
- Un auto no autorisa para den vak geel
- Staciona den dos vak blanco
- Parkeer unda no tin vak pinta
- Para auto riba acera of pega na un skina
Mester tene na cuenta cu esaki por tuma lugar na cualkier momento y no solamente den e orario di stacionamento menciona anteriormente.
Tarifanan di stacionamento
Tarifanan pa loke ta stacionamento den Centro di Oranjestad ta:
- 50 Cent pa 15 minuut
- 1 Florin pa 30 minuut
- 2 Florin pa 2 ora (den siman)
- 2 Florin pa 3 ora (tur diasabra)
- Patras di Botica Oduber por parkeer gratis 3 ora registrando e number di vak na e parkeermeter
- Na Stacion di Bus grandi di Oranjestad por parkeer gratis 3 ora registrando e number di vak na e parkeermeter
Di e manera aki Aruparking ta desea di concientisa nos comunidad pa staciona den Centro di Oranjestad cumpliendo cu e reglanan estableci, pa asina evita sancionnan cu lo por wordo tuma contra di e usuario.
