Ya caba pa algun tempo Aruba Tourism Authority y Comite Olimpico Arubano ta den combersacion pa firma un acuerdo cu lo ta beneficioso pa ambos partido. Durante un conferencia di prensa Ronella Croes- CEO di A.T.A., Wanda Broeksema- Presidente di C.O.A. y Nicole Hoevertsz- Secretario General di C.O.A. a firma e acuerdo aki, unda cu A.T.A. lo ta un socio di Comite Olimpico Arubano.
E asociacion aki ta uno natural, mirando cu e atletanan cu C.O.A. ta cultiva y desaroya ta representa nos pais dignamente y ta un promocion grandi pa Aruba, pa medio di nan participacion den diferente competencia, na diferente pais. Sin lubida e promocion grandi cu Aruba ta haya durante weganan olimpico.
Den pasado A.T.A. a contribui cu e diseño di e logo di C.O.A. y tambe e uniformnan di C.O.A. a traves di un agencia cu A.T.A. tawata traha cun’e.
E balornan Olimpico cu C.O.A. ta promove ta alinea completamente cu A.T.A su obhetivonan strategico, cu entre otro ta pa crea bienestar pa e comunidad local. Den caso di C.O.A. ta haci esaki poniendo deporte na servicio di humanidad como un filosofia di bida y den caso di A.T.A. a traves di Turismo.
A.T.A. y C.O.A. ta comparti e opinion cu e inversion den nos hendenan, nos hobennan, ta sumamente importante paso nan ta nos ‘role models’, no solamente ora nan ta representa Aruba internacionalmente pero tambe na Aruba mes.
Pa ambos partido esaki ta un momento hopi bunita, yena cu positivismo cu ta crea oportunidadnan nobo pa nos atletanan, pa nos turismo y pa Aruba.
