Enfocando riba salud y bienestar(“wellness”), a introduci QR-FIT na Aruba.
Oficina di Turismo, A.T.A., conhuntamente cu Minister di Turismo y Salud Publico, Minister di Educacion y Deporte, IBISA y QR-FIT a anuncia e prome ruta di QR-FIT na Aruba durante un conferencia di prensa.
Mirando e rol importante di A.T.A. den e maneho di destino, ta busca y encurasha semper productonan y experiencianan nobo pa nos bishitantenan. Algun aña atras, como parti di A.T.A. su strategia a delinea diferente area/“niche” turistico cu por wordo uza pa atrae turistanan sin pone peso adicional riba nos capacidad. Un di e nichenan aki ta bienestar/ “wellness”. Especialmente despues di pandemia actividadnan cu ta enfoca riba bienestar a bira mas importante.
Ya pa varios aña A.T.A. conhuntamente cu diferente socio a inverti den diferente area publico unda tanto turista como local ta haci ehercicio. Mayoria di e areanan aki ta wordo uza pa personanan cu ta cana y core. Hopi biaha esnan cu ta cana of core por tin falta di incorpora ehercicionan cu ta fortalece nan musculonan. Pa e motibo ey e ekipo di QR-FIT a cuminsa cu QR-FIT na Hulanda. E meta ta pa facilita ehercicionan cu ta fortalece musculonan, mientras ta haci uzo di espacionan publico y aire liber.
E idea ta cu e usuario ta haci uzo di e QR-FIT app riba nan telefon pa asina haci e ehercicionan na e 12 puntonan riba e ruta di 2.5km. Por scoge e nivel di ehercicio y un video lo indica con e ehercicio mester wordo haci pa e nivel cu e usuario a scoge. Entre e diferente puntonan e usuario por cana of core, depende di su nivel fisico.
Aruba ta bira e prome destino pafo di Hulanda cu ta traha cu QR-FIT. A.T.A. ta contento di por ta parti di e proyecto aki y ta agradecido pa e sosten ricibi for di tur e socionan cu a traha duro pa por a logra concretisa e proyecto aki.
