Dia 4 di oktober ultimo, Oficina di Turismo tabata tin e placer di celebra e bishita inaugural di Carnival Venezia na Aruba. E barco cu ta pertenece na e linea prestigioso di Carnival Cruise Lines a yega Aruba den oranan di mainta cu mas di 4000 pasahero abordo, kendenan tabata tin e oportunidad pa baha y explora tur loke nos isla tin di ofrece.
Aruba Tourism Authority (A.T.A.) tabata presente pa duna tripulantenan y turistanan un caluroso bonbini. Den un intercambio ceremonial, Sr. Patrick Melchiors di A.T.A. a presenta un plakkaat conmemorativo na Capitan Crescenzo Palomba, marcando e momento historico aki. E plakkaat a sirbi como un testimonio di e dedicacion di A.T.A. y di nos isla na e industria crucero y e compromiso pa sigui crea lasonan fuerte cu Carnival Cruise Lines. En cambio, A.T.A. tambe a ricibi un plakkaat for di Carnival Cruise Lines, simbolisando e aliansa entre e dos entidadnan pa crea experencianan memorabel pa bishitantenan crucero. Durante e mainta aki, A.T.A. a keda compaña pa CEO y Gerente di Aruba Ports Authority N.V., representantenan di Gobierno di Aruba y Shipping Agent(s) di Maduro and Sons.
Construi na aña 2019 y renoba na 2023, Carnival Venezia ta un crucero luhoso cu tin un capacidad di 5260 pasahero, entre nan 1393 miembro di tripulacion. Carnival Venezia ta conta cu un variedad di comodidad pa su pasaheronan, incluyendo e ultimo den tecnologia y hospitalidad di clase mundial.
A.T.A. ta expresa gratitud y aprecio pa e relacion cu Carnival Cruise Lines y ta reconoce a papel importante cu nan ta hunga den promocion di Aruba como un destinacion lider den Caribe cerca biaheronan. E bishita di Carnival Venezia ta demonstra fortalesa di Aruba como destinacion crucero. E aliansa cu Carnival Cruise Lines ta cuadra cu A.T.A. su maneho y modelo di di turismo di ‘balor halto y impacto abou’ (high value, low impact), caminda ta enfoca riba cruceronan y pasaheronan di calidad halto mientras ta tene na cuenta desaroyo sostenibel den e sector aki.
A.T.A. lo sigui traha di cerca hunto cu A.P.A. y otro socionan turistico pa trece mas cruceronan prestigioso pa nos isla cu ta contribui na economia di Aruba.
Bonbini na Aruba, Carnival Venezia!
