‘Marcando un capitulo significante den e celebracion cultural di e isla’
Pa hopi aña, A.T.A. a forma parti di e forsa integral tras di e exito y reconocimento global di Carnaval di Aruba. Cu un compromiso di un patrocinio substancial, A.T.A. a bin ta hunga un papel crucial den mantene e cultura di carnaval bibo durante e diferente etapanan cu nos carnaval a bin ta conoce.
Patronicio General na Carnaval
E aña aki no ta diferente, A.T.A. un biaha mas a drenta un bunita patrocinio hunto cu SMAC pa asina por asegura un temporada di carnaval exitoso. Banda di esaki, por a conta cu un patrocinio na Stichting MUSICA cu ta encarga pa organisa y eleva nos Caiso y Soca Monarch.
Orkesta di Steelpan – Carnaval 70
Mirando cu e aña aki nos ta conta cu un celebracion historico pa Aruba, A.T.A. ta hiba tur expectador di e carnaval bek na e inicio. A.T.A. ta dedica e pasado y presente cu e sonido encantador di e orkesta di steelpan di ‘The Invaders’ como e grupo cu lo guia carnaval 70. Un grupo cu sigur a alinea na e vision di A.T.A. pa cu e proyecto aki. Asegurando preservacion y celebracion di e instrumento tradicional Caribense aki, pa asina trece e espirito vibrante di Carnaval y creando un experiencia inolvidabel pa tur hende. Hunto cu esaki, lo conta cu presentacion di diferente cancionan di antes te cu awo, y un presentacion visual por medio di un video.
Reconocimento Global: Prensa Internacional y Creador di Contenido ‘Influencers’
Cu un exposicion global, Carnaval di Aruba awor ta conoci como un di e eventonan mas popular riba e calendario cultural internacional. Por menciona cu a logra na atrae prensa internacional como tambe creador di contenido ‘influencers’ como un iniciativa strategico A.T.A. E aña aki a invita un grupo di prensa internacional y creador di contenido ‘influencers’ pa presencia y documenta e tradicion, preparacion, y evento espectacular di nos carnaval.
A.T.A. ta keda un colaborador constante, enrikeciendo e experiencia di Carnaval y asegurando cu e magia di e celebracion cultural di Aruba wordo comparti cu henter mundo.
Iniciativa Local Ban Serio!
Como un paso firme pa cu sostenibilidad, iniciativa di A.T.A., esta Ban Serio!, ta lansa campaña ‘Scoge pa bleki, e ritmo di recicla’. Un campaña di conscientisacion caminda cu ta promove e beneficionan ambiental ora di scoge pa bleki enbes di glas of plastic durante 2024. Esaki ta inclui pa tene Aruba Limpi y scoge pa recicla. Facebook/ Instagram: Ban Serio Aruba.
A.T.A. ta felicita e comunidad carnavaleso y e comunidad di Aruba pa un tremendo celebracion di 70 aña di carnaval. Cu hopi zjeito, pasion, color y fantasia nos a sa di bria y engrandece nos carnaval. Cu inmenso orguyo nos ta sigui aporta na nos cultura. Ban celebra nos legado rico y vibrante. Feliz Carnaval 70! Cuida nos muchanan y gosa sanamente.
