6 mil persona a completa e programa di certificacion entre 2018 y 2022:
Aruba Tourism Authority a firma un acuerdo cu Aruba Excellence Foundation (AEF) pa un periodo di tres aña. Cu e acuerdo aki, A.T.A. ta extende su compromiso pa sigui pone enfasis riba esfuersonan fundamental pa desaroyo di e producto Aruba.
Durante hopi aña, A.T.A. a brinda sosten na e Aruba Certification Program (ACP) y a lidera introduccion di e programa di Happy Information Officers (HIO). Ambos iniciativa ta contribui na mehoracion di e experencia di e bishitantenan y ta contribui na e strategia di turismo di ‘high value-low impact’ (balor halto, impacto abou) cu ta cuadra cu e obhetivonan di A.T.A.
Den un esfuerso pa sigui cu un maneho sostenibel, na 2018 A.T.A. a analisa e miho manera pa sigui padilanti y a opta pa pone e maneho y evolucion di ACP y HIO den man di un organisacion independiente, esta Aruba Excellence Foundation (AEF).
AEF a wordo estableci cu e obhetivo pa desaroya y implementa programanan cu ta agrega balor y cu ta mehora e calidad di servicio den e industria di turismo y hospitalidad. AEF ta wordo supervisa door di un hunta di supervision cu ta representa e diferente pilarnan di e industria di turismo. Miembronan di e hunta di supervision actual ta Shadey Figaroa na nomber di A.T.A. y na mes momento presidente di e hunta di supervision, Louella Brezovar- van Veen na nomber di AHATA, Joanne Croes na nomber di Universidad di Aruba y Ben Figaroa y Marc Figaroa na nomber di Ministerio di Turismo.
Un di e indicadornan principal pa midi e prestacion y exito di AEF, ta e cantidad di persona cu a wordo certifica pa e programa di ACP. Asina por menciona cu mas di 6 mil persona a completa e programa di certificacion entre 2018 y 2022.
E direccion strategico di AEF pa 2023-2025 ta enfoca riba temanan manera innovacion, sostenibilidad y liderazgo y tin como meta principal pa posiciona AEF como e Autoridad di Hospitalidad di Aruba, cu ta e entidad di entrenamento reconoci pa A.T.A. y cu ta encarga pa lidera e forsa laboral den e area di hospitalidad y turismo.
Den e añanan venidero, AEF lo mantene su proposito fundamental, esta pa stimula e calidad di experencia di bishitantenan pa medio di programanan educativo cu ta promove e hospitalidad y amabilidad di Aruba, incluyendo temanan manera caracteristicanan di Aruba, historia, geologia, flora y fauna, y e principionan di Zjeito. Den cuadro di esaki, e obhetivo ta pa amplia e portfolio di AEF por medio di programanan nobo manera Service Excellence Training Program, Storytelling Training Program y Sustainable Leadership Program, cual ya caba ta ser ofresi pa AEF.
Na mes momento lo modernisa e programa di ACP pa asina e por ta mas atractivo pa diferente tipo di participante y por sigura cu ta empodera y motiva e participantenan aki a traves di informacion correcto y conciso y uzando e asina yama “21st century skills”, cu lo yuda nan den nan bida y carera.
Den un scenario optimista, ta premira cu un cantidad di 3000 persona lo wordo certifica den aña 2023, 3750 persona na 2024 y 4500 persona na 2025. Den un scenario mas realistico, ta calcula cu algo mas di 6 mil persona lo ricibi nan certificacion entre 2023-2025.
Aruba Certification Program a haci tambe un proyecto piloto cu St. Paulus School cu a mustra di ta un exito. AEF lo sigui traha hunto cu e diferente entidadnan di educacion pa asina por percura cu por agrega e contenido aki den curiculonan di scol.
Di acuerdo cu e modelo di turismo di A.T.A. di ‘high value-low impact’ y pa medio di e acuerdo cu AEF, A.T.A ta reconoce cu desaroya abilidadnan manera conocemento di producto y ‘soft skills’ ta keda esencial pa por conecta cu bishitante riba nos isla y logra un efecto duradero y experencia inolvidabel.
