Den un comunicado di prensa, 11 Sindicato y 2 Organisacion a duna nan reaccion riba e resultado di e reunion di Conseho di Minister di Reino di 17 di december 2021. Na final di e reunion Secretario di Estado Knops a duna un declaracion y a splica riba e resultado di e reunion pa Aruba. Basa riba e declaracion aki, 11 Sindicato y 2 Organisacion a formula nan opinion y a saca 3 conclusion. Den e articulo aki Gobierno ta brinda splicacion riba e di tres ponencia.
Segun sindicato:
Aruba lo no kier un protocol pa financieel toezicht
Splicacion Gobierno:
Desde aña 2015 Aruba tin un protocol cu Hulanda pa, entre otro, ancra e supervision financiero di CAFT y e normanan financiero cu mester tene na dje pa por yega na un maneho financiero manehabel y sostenibel pa Aruba. Na 2018 e protocol aki a wordo prolonga pa 3 aña mas y aden a stipula normanan financiero nobo pa Aruba tene na dje den 2019 te cu 2021. Na fin di aña 2021 e protocol aki ta vence y cune normanan, cu ta base di supervision financiero, ta vence tambe. Debi na e situacion di pandemia di COVID19 den aña 2020 y hunto cune e retonan financiero y economico cu a surgi, Gobierno a pidi Hulanda pa por desvia di e normanan den aña 2020. CAFT a duna conseho positivo pa cu esaki y Conseho di Reino a aproba e peticion pa Aruba por desvia di e normanan financiero.
Pa Aruba por sali mas fuerte for di e pandemia y teniendo na cuenta cu Hulanda a presta Aruba un suma cuantioso pa por enfrenta y surpasa e pandemia, Hulanda a bin cu e COHO como un organo pa supervisa e reformanan necesario pa Aruba por bira mas fuerte. Banda di esaki Hulanda a bin cu e condicion cu e supervision financiero di Aruba, lo mester bay wordo regla den un Ley di Consenso di Reino, e Rijkswet Aruba Financieel Toezicht RAFT, en bes di den un protocol manera cu a bin ta haci esaki desde 2015. Pa yega na e texto cu mester bin den e RAFT y den su ‘Memorie van Toelichting,’ Gobierno tin un team di profesionalnan cu ta asisti Minister President den e negosacionnan necesario. Riba e nivel ‘ambtelijk,’ ‘bestuurlijk’ y di
Conseho di Minister di Reino a yega na un acuerdo riba e texto pa e RAFT, pero ainda falta haya sa ki tempo Conseho di Minister di Reino lo manda e ley aki Parlamento di Aruba y Tweede Kamer di Hulanda pa su tratamento.
Conclusion:
Aruba tin un protocol pa supervision financiero desde 2015. Awor tin negociacion cu Hulanda pa e supervision financiero aki bay den e Ley di Consenso di Reino RAFT. Pues no ta asina cu Gobierno no lo kier un protocol pa financieel toezicht