ORANJESTAD,Aruba
Den e conferencia di anochi di Gobierno riba coronavirus, Prome Minister Evelyn Wever Croes a anuncia cu e cantidad di casonan positivo a subi di 8 pa 9. E dos ultimo casonan ta di contagion local.
Prome Minister Wever Croes a cuminsa pa splica cu e persona positivo nobo ta un local y tur ta den bon estado di salud, mustrando sintomanan leve. E ultimo aki ta pensa ta un transmission local. E no a biaha den hopi tempo. Di e total di 9, dos ta turista y shete hende local, di cual cinco a bini di biahe cu e virus. E otro dosnan a keda contagia localmente. E ta muestra cu a cuminsa pega otro localmente, y den esaki ta urgente y importante e distanciamento social.
E mandatario a pidi pa no laga e virus aki plama di mas y haci cu tur e sacrificionan aki ta en vano door di actonan di iresponsabilidad.
Ta organisando algun biaha pa trece residentenan pega den exterior. E hendenan aki mester ta registra na ATA. Den e siguiente e dianan lo yama pa verifica informacion pa regla e biahenan.
Fiscal Pronk di Ministerio Publico tambe presente den e conferencia di prensa a splica, cu tabatin 31 persona deteni riba e prome anochi di toque de queda tabatin 31 detencion. Di esaki 29 di e personanan a haya un boet di 1000 florin y dos di nan a haya un boet extra di 400 florin pasobra nan a resisti nan detencion. Tur e personanan aki mester paga e boet den dos siman di tempo na Ministerio Publico. E transaccion por wordo haci online. Tur informacion pa cu esaki ta disponibel riba Facebook di Ministerio Publico. Si despues di dos siman no pague, nan tin problema, pasobra lo bay cita nan pa presenta dilanti Hues y esaki ta nifica cu AUTOMATICAMENTE e boet ta aumenta, dependiendo cu e situacion. Si Hues ta di acuerdo cu fiscal pa duna un boet mas halto, y si nan no kier paga, mester hiba e personanan KIA. Pesey e ta haci un suplica na tur hende pa keda cas.
Fiscal Pronk a pidi pa respeta autoridad y keda paden.
