Diahuebs ultimo tabatin e di dos edicion di e sesion pa brainstorm organisa dor di Partido di Pueblo Arubano (AVP). E encuentro a tuma luga den Renaissance Convention Center cu presencia di tur stakeholder cu a keda invita pa e ocasion. Entre nan tabata Aruba Timeshare Association (ATSA), representa pa Jurgen van Schaijk y Sulaika Kelly.
Despues di a hiba palabra treciendo dilanti nan puntonan di preocupacion y sugerencia pa cu e sector di timeshare, e miembronan di e comision organisado tabatin oportunidad di haci pregunta y/of comentario. E delegacion di AVP ta consisti di lider mr. Mike Eman y candidatonan Jennifer Arends-Reyes, mr. Gerlien Croes, mr. drs. Richard Arends y tambe drs. Gervais ‘Rene’ Herde’.
Van Schaijk a expresa na su salida cu e organisacion a acepta e invitacion di AVP na e sesion pasobra nan ta kere firmemente cu dor di delibera hunto cu mirada riba futuro, por determina kico ta e cambionan necesario aworaki pa enfrenta e problemanan cu tin. ATSA a trece dilanti cu no tin suficientemente demanda ainda pa estadia na Aruba, aunke nan sector ta miho para cu esun di hotel.
“Winston Churchill a bisa un biaha: ‘Nunca desperdicia un bon crisis’,” asina van Schaijk a bisa. “Si nos kier cambia nos comunidad; si nos kier cambia e manera con nos ta opera na Aruba, awe y aworaki ta e momento pa nos haci tur e cambionan.” E empresario hotelero ta pensa cu dor di sucha otro su opinion, por yega hunto na metanan.
Otro participantenan di e edicion aki tabata Federacion di Trahadornan di Aruba (FTA) y varios compania di servicio di taxi. E obhetivo di e sesionnan cu den pasado a cubri tambe e crisis di COVID-19 den sector di cuido medico, ta pa scucha, pensa y recupera mihor. E preguntanan cu a pidi na cada stakeholder ta kico ta nan perspectiva riba e retonan pa turismo, economia y mercado laboral, y kico lo ta nan recomendacion pa recupera miho.
