ORANJESTAD,Aruba
Abogadonan den Corte a cuestiona e hecho cu autoridadnan a viola tratadonan internacional ora cu a intercepta un barkito cu droga panort di Aruba. Pero e argumento aki a wordo desbarata door di Hues y Corte.
Keillar Hernandez Olaya; Juli Diaz Morales; Gerli Larrada Martinez y Andri Rivas Guanipa a perde tur speransa ora cu a scucha Hues splica nan cu e argumento ey no ta valido. Nan a wordo acusa di tabatin 430 kilo di cocaína den nan poder pa “door voer”.
Loke a pasa e dia ey ta cu nan boto tabata den awa teritorial Venezolano. Y segun e Abogadonan, pa e motibo aki Aruba no tabatin autoridad pa rista of detene nan. Consecuentemente Kustwacht a actua ilegal.
Hues a splica cu den e dossier ta aparece cu durante patruya nan a detecta riba nan sistema un boto poco sospechoso cu tabata nabega panort di e islanan ABC. Nan a keda vigil’e un rato y a constata cu e tabata bayendo direccion di Aruba. E momento ey a cuminsa cu e procedura pa control di e boto. Personal di Kustwacht a constata cu e boto ta “staatloos” pa motibo cu e no tabatin un bandera ta bula manera ley ta exigi y a constata cu e no tin number di registracion tampoco. A cuminsa tuma contacto cu e nave, pero no a haya reaccion. Despues di varios intento, a dicidi di abordo e boto. A base di esaki, y analisando e diferente Tratadonan internacional, Hues a bisa, Aruba tin tur autoridad pa intercepta e boto.
Den e boto a haya un cargamento grandi di droga.
E argumento di dos di e acusadonan, cu nan tabata bou menasa, tampoco tabata un argumento acepta pa Corte. Pa Hues ta imposibel pa kere cu un cargamento asina grandi di mas cu 400 kilo cu un balor di miyones ta wordo poni sin mas den man di personanan cu e doño no conoce. Un cargamento similar confisca na Rusia aña pasa tabatin un balor di 50 miyon dollar. Esaki pasobra e dosnan aki a bisa cu nan no tabata sa kico tin abordo di e boto cu nan mester a transporta. A bin realisa cu ta trata di droga ora cu hombernan a cuminsa hiba e droga abordo cu personanan arma para tur rond. Na e momentonan ey, segun Hernandez y Larrada, nan kier a hala atras, pero nan a wordo menasa cu arma di candela. E storia aki Hues no a acepta. “E cargamento ta demasiado valioso pa lague den man di personanan desconoci,” el a bisa e acusadonan.
Teniendo cuenta cu e cantidad grandi aki, Hues a dicidi di bay di acuerdo cu e castigo demanda door di Ministerio Publico, esta seis aña incondicional.
