E siman aki a tuma luga e di 31 edicion di e Conferencia Annual di Turismo (CATA). Debi na e pandemia actual, esaki ta e di dos aña cu e conferencia ta tuma luga virtualmente.
Esaki a sosode diamars mainta unda e conferencia wordo habri cu palabranan di bonbini di e directora di A.T.A. pa e mercado Latino Americano Sra. Miriam Dabian.
CEO di A.T.A. Ronella Croes a dirigi palabra di bonbini na tur participante y a comparti entre otro e importancia di CATA pa cu e mercado di turismo procedente di Latino America. El a laga sa cu e capacidad di nos destinacion pa adapta na tur loke ta pasando ta loke a caracterisa nos pa 2020 y 2021. Nos tur a traha incansabel pa wak e bienestar di nos comunidad y asina mantene un balans entre turismo y e control di e pandemia actual na Aruba.
Na februari e aña aki, a actualisa e vacunacion nacional di nos comunidad unda awendia mas cu 70% di nos poblacion ariba 18 aña ta vacuna. Cu e introduccion di e vacunacion por a mira un reactivacion significante pa cu e cantidad di bishitante pa nos isla. Esaki, banda di otro factornan, a y ta dunando un seguridad pa esnan cu ta biba na Aruba como tambe na e bishitantenan cu ta bishita nos destinacion. Cu e combinacion di e vacunacion y e protocolnan introduci di bioseguridad, turismo pa Aruba ta creciendo atrobe.
Ta proyecta cu pa fin di 2021, Aruba lo yega na 74% di recuperacion di su turismo compara cu 2019. Na juli 2021 Aruba a recupera cu 97% di turismo compara cu e mesun luna na 2019.
E mercado Latinoamericano a wordo afecta door di diferente medida entre otro e ceramento di varios frontera. Sinembargo, e di dos mitar di 2021 ta wordo mira positivamente pa turismo pa Aruba for di e region aki y ta di spera cu pa fin di 2021 e mercado Latino lo recupera cu 27% compara cu 2019. Esaki ta nifica un marketshare di 3% pa 2021.
For di e continente di Latinoamerica, Aruba ta ricibi vuelonan diario pa medio di dos hub importante: Colombia y Panama. Aki nos por conta cu 5 vuelo semanal di Avianca, 2 di Wingo y 2 di Copa. Pa fin di 2021 ta spera y ta traha pa Aruba lo a recupera completamente pa cu e vuelonan semanal unda nos lo por conta semanalmente cu 7 vuelo di Avianca, 11 vuelo di Copa y 2 di Wingo. Esaki den colaboracion estrecho cu Aruba Airport Authority.
Nos isla a busca diferente manera pa reinventa su mes durante 2020/2021. Apesar di e inkuitud y hopi incertidumbre relata na loke e pandemia a trece den e industria hotelero y nos turismo, nos isla a sa di sobresali y a traha fuerte pa su progreso y pa mehora su infrastructura y servicionan. Tur esaki teniendo na cuenta e desaroyo di un destinacion sostenibel tanto pa e localnan pero tambe pa e huespednan cu ta scoge Aruba pa bishita.
Asina renovacion di varios cambernan di hotel/timeshare a tuma luga, pero tambe un cantidad di lobby, restaurant, spa y e hotelnan mes a enfoca pa crea ekiponan specialisa den e limpiesa y bioseguridad di nan edificio y su alrededor, asina garantisando e seguridad di nan huesped y su empleadonan.
A comparti e vision strategico como tambe prioridadnan strategico bou di esnan presente. Ta gradici tur cu a participa na e exitoso apertura di CATA cual a wordo sigui riba diaranson pa multiple reunionnan entre socionan.
