Aruba por inicia cu e reduccion den e recorte salarial di 12,6 porciento. Esey a wordo dicidi awe den Conseho di Minister di Reino. Curacao y Sint Maarten no a ricibi lus berde ainda, nan ta evaluando e condicionnan ainda.
Secretario di Estado Alexandra van Huffelen di Relacionnan di Reino kier ofrece Aruba, Curacao y Sint Maarten e espacio pa cuminsa cu e reduccion den e recorte salarial. E ta contento cu Aruba por pone e prome paso. “Tur hende ta conciente cu e costonan di bida na e momento aki ta subiendo drasticamente. Ta logico tambe e ora cu a considera pa reduci e recorte di salario. Y ta bunita cu Aruba ta mira e posibilidad pa haci esaki awor.”
Pa cuminsa reduccion den e recorte di salario Hulanda a pone cuater condicion:
- E introduccion di e landsverordening normering topinkomens.
- E capital pa e reduccion parcial of completo di e recorte den salario mester ta inclui den e presupuesto propio. C(A)ft ta controla esaki.
- Na momento cu e recorte salarial wordo elimina completo, no lo por tin un deficit mas den e presupuesto, a lo menos cu un situacion imprevisto surgi di nobo.
- E recorte di 25% riba salarionan di politiconan pa awor ta keda na vigor.
Tambe a pidi e paisnan pa, si ta posibel, den e reduccion:
- Duna prioridad na e salarionan mas abou pa ricibi e reduccion den recorte salarial, ja cu esakinan ta sinti e efecto di e subida di costo di bida mas duro
- Presta atencion riba e acuerdonan haci anteriormente den e landspakketten pa modera condicionnan laboral
- Para keto na e hecho cu pa motibo di e reduccion den recorte salarial cierto trahadornan di gobierno por tin chance di tin salario mas halto cu politiconan cu ta cai bou di e recorte di 25% ainda.
Secretario di estado Van Huffelen ta spera cu Curacao y Sint Maarten por cuminsa marca paso tambe dentro di corto pa cuminsa cu e reduccion den recorte salarial tambe. Pa percura cu no lo tin retraso causa pa e reces di zomer te ora tin e siguiente RMR, Minister di Finanzas y Secretario di Estado ta autorisa pa determina si a cumpli cu e condiconnan y tuma un decision como resultado.
