Premier Evelyn Wever-Croes a duna un update di e negosacionnan cu Hulanda. Esaki despues cu prensa a haci e pregunta na e status mirando cu aparentemente Corsou y Hulanda lo a yega na acuerdo cu otro riba e condicionnan di Hulanda pa fiansa.
Premier Evelyn Wever-Croes a indica cu Gobierno di Aruba ya for di mas di un luna pasa caba a yega na un acuerdo similar, sinembargo tur cos a cambia ora cu dia 4 di september, Hulanda sin consulta cu Gobierno di Aruba, unilateralmente a cambia e condicionnan y a indica cu e 204 miyon florin lo mester yuda Aruba pa 5 luna, siendo cu e tabata destina den prome instante pa yuda Aruba cu 3 luna. Gobierno di Aruba mesora a informa Hulanda cu esaki no ta posibel pasobra a haci schuif cu e gastonan di juli y augustus cu mester wordo cubri awor.
Apesar cu Aruba a pidi Hulanda pa reconsidera nan decision, Hulanda a nenga y a forsa Aruba pa bay busca e fondo di juli y augustus su mes. Despues Hulanda a realisa nan eror y a indica di ta dispuesto pa presta Aruba e placa pero kier haya un conseho di Caft prome.
CAFT recientemente a duna Gobierno rason cu e placa tawata necesario por lo tanto Hulanda no ta supone di a kita e placa ey. Sinembargo, mientras cu esaki tawata pasando, Gobierno no por a warda mas y a haya e 173 miyon presta riba mercado local pa cual Gobierno di Aruba ta hopi agradecido.
Gobierno aworaki ainda ta wardando e decision di Hulanda riba e conseho di CAFT riba e necesidad financiero te cu fin di aña 2020, pa sigui papia riba e contenido di e Rijkswet.
E punto cu Corsou a yega awor, Aruba a yega mas cu un luna pasa caba. Ta di lamenta cu a bin atraso door di e decision di Hulanda di dia 4 di september. Awor nos ta wardando e decision di Hulanda riba e suma di fiansa pa nos traha un balans atrobe kico tur a cambia mientras tanto, pa despues bolbe cana e caminda di consulta cu gremionan y finalmente Parlamento. Nos ta keda cu confiansa y optimismo cu nos ta sali afo cu un areglo cu ta den bienestar di henter nos comunidad”, Premier Evelyn Wever-Croes a duna di conoce