Cu hopi celebracion y fanfaria, awe e crucero Celebrity Millennium di e compania Celebrity Cruises a drenta waf di Oranjestad atrobe. E ta e prome crucero cu ta yega nos isla bek cu pasahero abordo, despues di 15 luna cu e industria tabata practicamente inactivo. E crucero a sali for di Sint Maarten y ta pasa Aruba, Barbados y Corsou, pa despues regresa Sint Maarten atrobe. Cu esaki Aruba ta den e prome biahe atrobe, den henter Caribe.
“Lo no tabatin un miho momento, manera esaki pa celebra e hecho cu APA ta celebra 40 aña di exitencia e aña aki. Kias si no tabata pa e evento di awe, lo no tabatin mucho motibo pa celebra. Pero cu e yegada di un crucero awe, despues di 15 luna, ta un recordatorio pa henter nos personal y henter nos pueblo, cu turismo semper lo bounce back y waf den esaki semper a y lo sigui hunga un crucial”, asina Marc Figaroa, director di Aruba Ports Authority N.V. a bisa den su discurso na ocasion di e ceremonia cortico di recepcion di e prome crucero atrobe despues di e pandemia. “Nos a haci bon uzo di e temporada pa internamente nos adapta nos maneho, e protocolnan di salud, actualisa nos relacion cu partnernan strategico den e industria y awe por mira e resultado. Asina cu a cuminsa nabega atrobe, Aruba ta parece como prome den e iterinario”.
Pa awo, Celebrity Millennium lo bishita Aruba tur siman te cu fin di aña. Nan tambe mester a adapta tur nan protocolnan di salud hunto cu e instancianan di salud di Merca y tur e islanan unda nan ta bishita den nan iterinarionan. Pa awo e cruceronan lo start den fase y cu capacidad reduci pa garantisa espacio natural. A introduci mas tecnologia moderno pa adapta nan proceduranan ora di check in y ora di bandona e crucero.
Awo cu e huespednan y tripulantenan ta traha hunto pa promove siguridad y aspectonan di salud, a haci cu a yega na protocolnan nobo, cu ta inclui:
- Nabegacion vacuna – E crucero lo nabega den Caribe cu henter su tripulacion vacuna y por lo menos 95% di e pasaheronan tambe vacuna.
- Yegada y salidanan – Yegada y salidanan na e terminalnan lo sosode separa di otro, pues lo duna tur pasahero un ora exacto pa e yega. Asina e huespednan tin opcion pa yega nan mesun orario, basa riba nan plannan di vakantie.
- Transaccionnan sin contacto – E mobile app digital di Celebrity ta transforma e conocido “safety drill” di gruponan grandi di pasahero, den un experiencia personal cu e pasahero por haci den su celular mes, pa evita aglomeracion. Lo uza e mesun app aki tambe ora di aborda e crucero, pa lesa menu y hasta pa reserva un orario specifico pa come den restaurantnan of pa reserva tournan na tera.
- Tapaboca ora mester – Durante e proceso pa check-in y check-out den e terminalnan, lo exigi tur pasahero, desde 2 aña di edad bay ariba, pa tin un tapaboca bisti. Asina cu subi abordo, solamente si e ta otro instrui door di gobiernonan local, lo no exigi pa tin tapaboca bisti. Esey ta di acuerdo cu e reglanan di CDC pa nabegacion completamente vacuna.
“Turismo ta e pilar number un di nos isla y nos tur a nota e importancia di e industria di crucero den nos economia, awor cu nan tabata plat pa mas di un aña. Awo nos ta den e proceso di recuperacion y mescos cu ta sosodiendo cu aerolineanan, awor nos ta enfoca tambe riba e liñanan crucero pa yega nos isla atrobe. Nos a traha duro pa por tin tur protocol di salud na ordo, pa hunto cu e liñanan di crucero nos percura pa bienestar di tur nan pasaheronan, nan tripulacion y sin lubida nos pueblo tambe”, asina Dangui Oduber, Minister di Salud Publico, Turismo y Deporte, a duna di conoce na ocasion di yegada di e prome crucero atrobe den waf di Oranjestad. “Mi a bisa di un prome instante caba, cu Aruba lo sali duro for di e crisis aki. Nos tabata e pais mas afecta den e pandemia door cu nos ta depende totalmente di turismo, pero…kere mi cu nos lo bira tambe e pais cu lo recupera mas lihe, pasobra despues di pandemia…nos ta keda e isla mas bunita, cu hendenan mas cordial y cu e beachnan di mas bunita na mundo”.
E logro aki, esta pa Aruba ta inclui den e prome salida di cruceronan den Caribe no a sosode pa casualidad. Ta hopi dianan di negosacionnan continuo, trabou duro di trahadonan di APA hunto cu DVG riba e protocolnan di salud, atende tur asunto di nabegacion cu Directie Scheepvaart y fiha un strategia turistico hunto cu Ministerio di Turismo y ATA pa awor Aruba por ta para na e momento aki. “Mi no por keda sin subraya nos tremendo relacion cu Royal Caribbean Group, cu ta e compania encarga cu e lineanan Celebrity Cruises, Royal Caribbean International y Silver Seas. Nan a experencia nos seriedad y mas cu tur cos, nos compromiso pa cumpli cu tur regla y na mes momento pa ta anfrition di huespednan cu ta pura pa nabega y bay cu vakantie atrobe”, di acuerdo cu Marc Figaroa.
Aruba Ports Authority a percura pa un evento chikito, pero historico y importante den cuadro di nos recuperacion economico. Tanto Minister Presidente mr. Evelyn Wever-Croes, Minister Dangui Oduber, hefenan di e departamentonan concerni y cu ta partner den e logro importante aki pa nos turismo. A entrega e capitan di e crucero un recuerdo, como muestra di aprecio pa e hecho cu a scoge Aruba riba nan prome trip despues di 15 luna paralisa. Aruba ta gradici na Celebrity Cruises y ta spera di sigui mira su cruceronan yega nos isla cu mas frecuencia y cu mas pasahero abordo.
Tocante Celebrity Cruises:
Celebrity Cruises ta maneha un flota di 14 crucero cu ta ofrece pasaheronan un experiencia unico bishitando diferente destinacionnan. Celebrity ta conoci pa ta prome cu varios logro den e industria di crucero na mundo, manera por ehempel, nan ta e prome pa uza solar panel riba un crucero; e prome pa elimina botr’i awa di plastic abordo; e prome pa tin un capitan femenino di Merca na cabes y e prome pa tabatin un matrimonio legal di mesun sexo abordo di nan crucero. Celebrity Cruises ta nabega pa tur shete continente, bishitando mas di 300 destinacion den 70 pais. Celebrity Cruises ta un di e cinco marcanan renombra mundialmente cu ta pertenece na e compania Royal Caribbean Group.
Tocante Aruba Ports Authority:
A funda Aruba Ports Authority N.V. desde aña 1981, pues ta celebra 40 aña di existencia e aña aki. E compania ta pertenece 100% di Gobierno di Aruba y tin 80 trahado den servicio directo. Hunto nan ta maneha e dos wafnan di Aruba, pues tanto esun di crucero na Oranjestad como tambe esun di carga na Barcadera, unda nan tin un acuerdo di operacion cu ASTEC. Pa aña ta yega mas o menos 300 crucero na Oranjestad y un otro ?? barco di carga na Barcadera. E compania ta stabiel y ta bou maneho di Marc Figaroa.
