San Juan, ta un di fiestanan tradicional unico di Aruba, cu ta ser celebra riba 24 di juni. Un dia tradicional di dera e gay. Departamento di Cultura Aruba (DCA) a cuminsa por lo menos 10 dia prome cu e dia 24 di juni, caminda cu seccion di implementacion di dicho departamento a sali haci entrega di e buki ‘Ban Hunga Wega y Siña mas di Fiesta di Dia di San Juan, dera gay’ na tur scolnan preparatorio y basico di Aruba. For di 2013 a entrega caba e ‘Caha di Tradicion Cultural Fiesta di San Juan’ yena cu informacion pa e maestronan di scol basico. Na 2019 DCA a entrega e buki ‘Shon Wantomba y e Celebracion di Dia di San Juan’, y aña pasa na 2020 a haci entrega di un USB-stick cu material virtual saca fo’i di e mesun buki ‘Shon Wantomba y e Celebracion di Dia di San Juan’. E aña aki DCA a entrega e buki manera ya menciona na 61 scol, tanto scol preparatorio y basico cu lo contribui na mantene y promove nos tradicion y folklore cerca nos alumnonan.
E celebracion aki tin su origen entre e indjannan pagano di siglonan pasa cu a origina for di sur di Mexico despues pasa pa frontera di Guatemala y otro paisnan di Centro Americano, yega Venezuela pa despues ser treci Aruba unda el a keda un tradicion te dia di awe. “Dera Gay” a bira un tradicion Arubano celebra tur luna di juni riba nos isla. El a cuminsa realmente como un ceramento di un temporada Agricola di un cosecha bieu pa otro nobo. E indjannan cu tabata biba cerca di naturalesa, tabatin masha miedo di lo desconocido y sigur di Diosnan. Asina ta cu ora e temporada di cosecha a pasa nan lo haci e cunucu limpi y e resto di e cosecha bieu lo wordo kima. No tabatin miho forma di purificacion cu haci uzo di candela, pero na e mesun momento nan lo tabata haciendo ofrenda na e Dios di candela.
Pa nan gradici varios Dios cu tabata instrumental den nan creencia yudando nan cu e yobida y solo cu ta necesario. E indjannan y despues e cunukeronan tur tabata gradici pa e abundancia di cosecha y uza e oportunidad pa pidi mas cosecha pa e aña venidero. Asina ta cu nan tabatin candela grandi riba e ultimo dia di e aña di cosecha y celebrando e Aña Nobo cu celebracion. Bo no por cera e parti bieu sin celebracion y purificacion. Riba e bispo di e aña di cosecha nobo, mientras cu e candela ta bira grandi den aira, e hende hombernan lo tabata bula riba e candelanan. Hopi competencia y desafio ta ser haci y tambe cu ronda di cuminda y bebida.
For di Mexico e festividad aki a haya su caminda pa Sur y America Central, Venezuela y Aruba. Isla di Aruba a adapta, cambia y amplia e celebracion. Pero e religion Catolico Romano a cambia y influencia hopi cos. E celebracion aki cu ta uno pagano lo no por ser cambia, asina ta nan a adapta esaki.
Pa mas cu dos siglo Dia di San Juan ta ser celebra riba Aruba. For di tur tempo agricultura a bira parti di e bida diario di e Arubiano su expresionnan cultural na unda evidentemente Dia di San Juan a bira parti di dje.
Despues di e temporada di cosecha, sea un bon of mal aña, fin di mei of trempan den luna di juni, e troncon y reis of resto di mata, maishi of otro cultivo ta ser saca for di suela. Esakinan ta ser colecta pa kima riba dia 23 di juni, bispo di Dia di San Juan. Riba dia 24 di juni, esta Dia di San Juan (Dia di Dera Gay), weganan ta ser hunga. Algun ta puramente atletico, manera coremento y bulamento. Tur e weganan aki mester ser haci prome cu 4’or di atardi; deramento di gay lo tuma luga prome cu solo baha. Den e tera un buraco lo ser coba. Un gay jong (bibo) ta ser poni den e buraco y tapa esaki cu un calbas corta na mita, asina cu e calbas lo ser poni riba e mesun nivel cu e area rond.
Un hende homber su wowo ta ser tapa cu un tela y ta wordo gedrey pa un hende muhe mientras cu e hende homber ta baila riba e tono musical di e cancion di “Deramento di Gay” data for di aña 1862, di manera cu e lo perde e sentido di direccion. Cu un palo (e mañal) den su mannan, mientras cu e ta baila y busca cu su pianan, e ta trata di sinti su caminda na unda e gay lo ta dera. E hende homber ta haya solamente tres chens pa haya su obhetivo. Despues di e tres chens y e no haya e gay, e ta ser cambia. Un otro bailado lo tuma su luga y sigui baila y busca. Esun cu gana, e gay lo ta e premio.
Awendia e actividadnan aki ta tuma luga na diferente caminda riba henter nos isla, cu weganan y competencia. Na luga di e gay bibo, un calbas ta ser uza. E colornan predominante cu ta ser uza na e fiestanan aki ta geel, cora y preto.
E celebracion aki di San Juan ta ser promovi como un tradicion di nos cultura entre nos hubentud y henter e comunidad Arubano. Departamento di Cultura Aruba ta promove e celebracion aki tur aña den e compromiso cu e educacion cultural entre nos habitantenan di Aruba. E aña aki ya ta pa di 23 aña cu e proyectonan escolar aki ta tuma luga.
Ta bon pa nos siña mas y mas di nos tradicion cultural y comparti esaki cu otronan.
Cultura bo tin cu Bib’e. Biba nos Cultura, Biba San Juan!
