ORANJESTAD, Aruba
Aruba semper ta uni ora cu mester yuda nos comunidad, esaki ta wordo proba un bez mas cu CEDE Aruba su campaña di Happy to Give Back. Na momento cu a aserca diferente radionan pa yuda cu e campaña pa recauda fondo pa 3 instancia den nos comunidad, a logra uni mayoria di e radio emisoranan local y TeleAruba pa un Radio-y Telethon Nacional.
E radio/telethon lo tin un duracion di 48 ora, riba dianan 28, 29 y 30 di augustus venidero.
Durante conferencia di prensa dia 20 di augustus, tur radio emisora y canal di TV a firma un “promesa” (acuerdo) cu ta comete nan mes na e HTGB Radio-y Telethon Nacional y hunto lo duna nan air-time pa e bunita causa aki.
Tur emisora cu ta participa, lo tin nan formato dedica na e causa aki combina cu animacion, entrevista, bishita y otro actividadnan cu lo yuda den recauda fondo pa diferente famianan den nos comunidad cu ta pasando den momentonan dificil, cui e pandemia aki a causa.
48 ora, 12 emisora y nos planta nacional lo transmiti e mesun programacion simultaneamente, pa asina HTGB por recauda mas fondo posibel.
E campaña di Happy to Give Back di CEDE Aruba a cuminsa na luna di april y a logra di recauda $317.000 te luna di augustus y ta spera cu e Happy to Give Back Radio-y Telethon Nacional lo por recauda mucho mas. 100% di e fondo recauda ta bay pa sostene 3 instancia local cu ta yuda personan cu cuminda y otro productonan essencial. E tres instancianan ta, FPNC (banco di cuminda nacional), Ban Uni Man Pa Cria Nos Muchanan (programa di desayuno pa muchanan na scol) y Meals on Wheels @ YMCA.
CEDE Aruba y Happy to Give Back ta contento di por a uni mayoria di e emisoranan local y nos planta nacional. Un danki special ta bay na Blue FM, Canal 90, Cool Fm, Heart Radio, Magic FM, Top FM, Hits 100, Latina FM, Bo Guia FM, Massive FM, Caliente FM, Fresh FM, TeleAruba y Elite studios, tur boluntario y companianan, personanan cu a haci donacion unda cu lo haci e Happy to Give Back Radio-y Telethon Nacional uno exitoso.
Ainda tin tempo pa organisacionan of personanan forma parti di e Happy to Give Back Radio-y Telethon Nacional. Por manda un email pa info@happytogiveback.com of tuma contacto cu Nathalie Rietman na 630 5451.
Pa haci donacion, bishita: www.happytogiveback.com
