Aruba presente na Netanya Israel

Recientemente e equipo di natacion di Aruba a sali rumbo pa Netanya Israel, pa e World Aquatics Junior Swimming Championships cu lo tuma lugar di 4-9 di september 2023. Contando cu participacion di mas cu 600 atleta for di mas cu 100 federacion nacional, nos isla chikito tambe lo wordo representa pa e atletanan Braynsly Dirksz y Gavin Kock, bou di guia di headcoach, Ismael Santiesteban.

E competencia lo tuma lugar na Wingate Institure, un facilidad traha cu e proposito pa tene eventonan internacional di nivel world-class. E facilidad, e Centro Nacional di Israel pa Educacion Fysico y Sport ta conta cu un piscina di competencia di 50 meter y un piscina di training tambe di 50 meter. Durante e siman di 4-9 di september e atletanan Braynsley Dirksz y Gavin Kock lo participa na diferente evento. E hoben Dirksz lo participa na un total di 7 evento, incluiendo e eventonan di 50, 100, y 200 meter Freestyle (estilo liber), 50, 100 y 200 meter Breastsroke (schoolslag) y por ultimo e evento di 200 meter Individual Medley (IM). E hoben Kock sin embargo ta participa na 6 evento, incluiendo e eventonan di 50 y 100 meter Freestyle (estilo liber), 50, 100 y 200 meter Breastsroke (schoolslag) y tambe lo competi den e evento di 200 meter Individual Medley (IM).

E competencia a cuminsa awe mainta, pues cu e diferencia di orario, 4:06 AM unda cu Braynsley y Gavin a participa na nan prome evento, 100 meter Breaststroke. Por bishita https://www.worldaquatics.com/ pa sigui e competencia live, pa wak resultado, y pa mas informacion di e competencia.