ORANJESTAD, Aruba
Despues di a scucha ayera e reunion cu e partnernan social y e presentacion di e directornan di Ministerio di Finanzas y di Asuntonan general y huridico, e realidad pa futuro di Aruba ta bira mas bisto. Un realidad cu den un paar di dia Gobierno mester tuma un decision cu medidanan draconico y consecuencianan pa largo plazo, mientras Hulanda a prepara e plan aki for di lunanan anterior. Defacto no ta mira pakico Hulanda kier introduci un ZBO, si ya Aruba a dicidi caba di bin cu un begrotingskamer.
E entidad nobo ZBO lo ta un organo cu lo ta entre Hulanda – ZBO – Aruba, kende lo consisti di Hulandesnan so y nombra door di Gobierno di Hulanda enbes di tin representacion di Arubiano tambe. Den Statuut por lesa cu e asuntonan di Reino ta ser atende a base di e coperacion existente entre e paisnan (y nan ministerionan) den Reino y no atravez di un ZBO cual awor via art. 39 ta trata di bin cu ne. Si Hulanda kier yega na un concordancia di e leynan cu ta conta pa tur cuater pais den Reino, anto cuminsa cu e posibilidad pa e.o. nos organisacionnan socio-cultural por aplica pa un subsidio cerca e fondonan hulandes. E organo aki lo tin como meta pa restructura e economia, bin cu reformanan den sector gubernamental, consolida e finanzas y fortifica e structura hudicial. Mester apunta akinan cu si ta trata di proyectonan economico; anto expertonan, empresanan y trahadornan local mester bin prome na remarca pa ehecuta e proyectonan. Sino lo no recupera e empresanan cu mester a cera nan portanan ni e empleadonan cu a perde trabou. E organo ZBO aki ta bay mas aleu cu e supervision financiero actual cu nos conoce, kende solamente mester duna cuenta na Hulanda y Aruba mes no tin nada di bisa den esei.
Si kier bin cu un control mas rigoroso, por haci esaki e.o. via e Ley di Reino cu desde 2010 ta conta pa Corou y St. Maarten. E gobierno di Aruba mes por formula un plan integral cu tur e proyectonan necesario riba tereno economico – enseñanza y cuido. Mester evita cu ta bin proyecta ideanan cu ta conta pa paisnan grandi – manera flexibilisa e ley di retiro – cu ta afecta e posicion di trahadornan y lo crea mas inseguridad riba mercado laboral. Imagina bo mes cu otronan ta bin participa den e capital di empresa Setar cu ta duna un aporte na e presupuesto di Gobierno. Hopi ta esnan cu ta kere cu si bay di acuerdo cu e condicionnan di Hulanda cu e situacion lo drecha. E sumanan cu lo presta Aruba ta un fianza cu mester paga bek y ta depende si Hulanda ta satisfecho cu e grado di reformacion, lo tin sosten financiero adicional pa un cantidad di aña acerca. Acepta e ZBO ta nifica cu te aña 2039 nos ta mara na merced di Hulanda y cu un autonomia cu no ta encera mucho. Den tal caso tabata miho cu na 1996 nos a opta pa yega na un Mancomunidad cu Hulanda, unda nos lo por mantene nos autonomia.
