Un di e otro punto principal di partido PPA pa enfoca riba dje ta pa trece cambio ta e parti di salubridad pa e pueblo general y tambe baha e costo di bida. Lider di partido PPA ta duna di conoce cu unda cu e por a bay e ciudadanonan ta acerca su persona y ta indica cu nan no por biba mas cu e calidad di bida cu tin na e momentonan aki. No ta un secreto cu gasolin ta caro, coriente ta caro, combustibel ta caro, cas ta caro y no ta tende cu parlamento y of gobierno ta mishi cu yun di e temanan aki.
Lider di partido PPA Otmar Oduber kier pa e pueblo sa cu PPA lo bay atende cu e puntonan aki menciona y lo percura pa cambia e sistema fiscal di BBO unda cu lo elimina esaki y cambia esaki na un BTW cu un sistema fiscal cu tur partido ta diacuerdo cu ne, pero yun no tin e druf pa haci e cambio necesario pa e pueblo di Aruba.
No ta mira cu yun politico tin e curashi y bisa cu lo tuma e decision aki. Berdad pa Aruba bay den un BTW ta bay haci un tiki dolor unda cu lo mester hala faha mara den e prome 6 luna pa e prome aña pero despues di e esfuerso ey cu ta haci hunto, e pueblo lo haya placa den su cartera.
Segun lider di PPA Otmar Oduber na momento cu introduci BTW lo baha e loonbelasting cu ta bay elimina e inkomstenbelasting y lo reduci windbelasting cu ta contrario na un BBO cu ta kita y ta haci e pueblo dolor.
No por ta asina cu un producto ta subi cu 1 florin den exterior y na momento cu e ciudadano mester cumpra esaki den supermercado e producto a subi mas cu dobel pa e ciudadano por cumpra. E situacion aki tin e pueblo di Aruba cansa na unda cu e costo di bida ta hopi caro.
Segun lider di PPA Otmar Oduber nos ta core busca 20 dollar di e turista pa bay inverti den un RWZI cu ta un responsabilidad di esunnan cu ta haci uzo di dje y no di e turista cu ta bin na e momento ey bishita Aruba y ta trece pa Aruba mas of menos un 40 pa 50 miyon pa aña, e pregunta ta keda dicon nos no ta inverti cu e suma aki y definitivamente Aruba bay riba gas.
Ta scucha cu ta papiando diferente metodonan diferente pa por produci coriente siendo cu nos sa cu esun cu ta cualifica y miho ta via gas y asina trece un reduccion di 20% pa 30% di berdad pa e pueblo di Aruba. Sinembargo cu mester di un bon plan pa yega na e meta aki sigur cu si, asina lider di PPA Otmar Oduber a indica.
A yega e momento cu gobierno mester focus pa haci inversion na camindanan cu ta yega na e pueblo, gobiernonan no por sigui tuma decisionnan cu nan ta miho para. Lider di partido PPA Otmar Oduber ta keda enfoca cu bahamento di gasto mester sosode y na mes momento lo mester cuminsa den cas unda cu partido PPA ta para pa 5 of maximo 7 minister unda cu a papia riba dje for di november aña pasa.
E minister nan cu mester haya e confiansa di e pueblo mester ta minister nan di berdad no “pretpakketjes“ mas pa dies complace hende mas. Mester tin gobernantenan cu ta determina y tin Aruba na pecho cu ta minister cu tin e deseo di yega 5 or di mainta traha te 10 or di anochi cumpli y si mester traha den weekend lo traha den weekend.
Esaki ta conta pa miembronan di parlamento tambe, e parlamentarionan cu no ta produci un ley y no ta haci ni un pregunta no mester ta den parlamento. Ta lamenta cu parlamentarionan cu den un aña no ta haci ni un pregunta na ministernan, esaki ta muestra cu por habri e caminda pa reduci e cantidad di parlamentarionan unda cu por baha na 15 of 17 parlamentario. Nos mester por focus riba parlamentarionan di calidad unda cu ta traha ley, vigila gobierno y percura pa Aruba bay padilanti.
