Pa por logra un mihor solucion pa desperdicio, mester pensa den termino di economia circular. Esaki kiermen cu lo mester evalua e tipo di desperdicio cu ta wordo produci, y con esaki por wordo recicla, re-usa of reduci. E cuidadano, pero sigur e sector comercial, tin nan responsabilidad den esaki pa por yega na solucionnan duradero, segun e vision di Daphne Lejuez, candidato number 2 riba lista di partido Accion21, riba e tema di maneho responsabel y productivo di nos desperdicio.
Cera Parkietenbos y enfoca riba reduci, re-usa y recicla
Sra. Lejuez ta enfatisa riba cera Parkietenbos y cap e area pa asina por usa esaki pa otro proposito duradero manera por ehempel un parke solar, of cualkier otro proposito na beneficio di e bario. Lejuez: “Lo evalua e diferente forma di deshaci di diferente tipo di desperdicio unda cu reduci, re-usa y recicla lo ta central.”
Aki por pensa por ehempel riba re-introduccion di statiegeld pa boternan di glas of blekinan, recicla y re-usa tur tipo di desperdicio, un incinerator chikito special pa desperdicio medico na hospital mes, un incinerator pa cadaver di animal na abattoir (manera tin na mortuarionan), duna espacio pa compania por re procesa taira pa uso di crea azeta, carbon black pa caretera, trottoir y/of otro procesonan cu lo por wordo compra door di sector publico, usa foyonan di mata pa crea compost pa sigui planta.
Renoba RWZI/Bubali Plas
Sra. Lejuez ta subraya riba e importancia di pone prioridad pa drecha RWZI cu ta data desde 1975, y cu ta trahando dobbel su capacidad cu e tin y mester wordo drecha cu urgencia. Sra. Lejuez ta bisa cu: “E costo pa un planta nobo ta alrededor di 60 miyon florin, y lo por wordo financia por medio di privatisa e planta, y unda lo inverti, opera y haci e mantencion di e planta manera por ehempel e mecanismo cu a ser implementa exitosamente caba na Boneiro den e regulacion di utilities.” Esaki, sra. Lejuez ta sigui na elabora cu lo wordo haci por medio di un desaho publico. E compania lo recupera su inversion door di bende e awa cu e ta procesa pa irrigacion cu e hotelnan y canchanan di golf, cu lo ta mas barata cu usa awa dushi. “Esaki lo no trece gasto adicional pa Land, pero si e solucion urgente y necesario pa e area di Palm Beach cu ta haci uso di e planta aki,” sra. Lejuez ta splica, agregando cu “e lo aumenta e capacidad, drecha e planta cu ta deteriora, percura pa no tin mal holo y evita un posibel desaster di desperdicio den nos lama.”
Optimalisa Serlimar
Un otro punto importante segun sra. Lejuez ta pa percura pa sanea e situacion financiero di Serlimar, inventarisa y aumenta eficiencia y productividad di e compania pa asina e por cuminsa cumpli cu su proposito original di cumpli cu e tarea gubernamental di mantencion di terenonan publico, recohe desperdicio residencial y mantene Aruba limpi den e budget cu e ta wordo asigna.
Serlimar mester por cubri su mesun gastonan independientemente. Lejuez: “Esaki ta algun di e solucionan proponi pa por yega na un maneho di desperdicio responsabel, sostenibel y duradero.”
