Durante e fin di siman cu a pasa, e equipo di Paintball di Aruba, Aruba Madness a drenta e terreno di bataua na North Carolina, Fayetteville cu hopi entusiasmo. Batayando contra equiponan grandi y bon equipa cu Pit crewnan grandi, e equipo chikito di Aruba a bai cu e energia y determinacion pa gana. Na final di e torneo e equipo di Aruba Madness a termina na di 3 lugar den division 3.
E torneo di Black Ops Paintball a tuma luar diasabra 2 di september, unda e equipo di Aruba Madness a hunga un total di 25 wega. Demonstrando nan habilidat, coordinacion y strategia. E bataya tawata fuerte y e equipo mester a lucha pa kada punto cu nan a gana. Diadomingo e equipo di Aruba Madness a mantene e momentum ora cu nan a enfrenta e reto di hunga 20 wega addicional. E hungandonan Americano a keda babuca di a mira Aruba Madness subi veld e siguiente dia, apesar di tur cansansio di e dia anterior. E equipo di Aruba Madness a sa di demonstra un forsa increibel, nan disiplina y con pa traha hunto como un unidad. Despues di 20 wega, Aruba Madness a sali na di 8 lugar den division 4. Según e equipo mes ta duna di conoce, Aruba Madness a bin e torneo pa hunga, y laga un impacto duradero. Demostrando cu e tamaño di e equipo no ta defini e potencial.
Aruba Madness ta invita henter pueblo di Aruba pa bin wak e deporte di Paintball na Parkietenbos, Prikibos, tur diadomingo.
