Den ultimo luna di aña tawata un luna bastante ocupa pa e club di servicio bon conoci den comunidad Aruba Lions Club cu pa mas cu 75 aña ta sirbiendo comunidad cu diferente projectonan caminda tin necesidad.
Despues cu comienso di December 2023 a entrega un cantidad grandi di paketenan di cuminda y un regalito di Pasco na muchanan menos afortuna, a sera e aña cu otro dos bunita gesto.
Ya pa algun tempo tin un grupo di hobennan di skol hinkando nan tempo liber den hasi musica y tawata tin e deseo pa hasi un grabacion musical di nan grupo di rock, pa asina por a jega na un produccion cu cancionnan propio y original.
E hobennan aki a aserka Aruba Lions Club cu di su banda a mira un bon opurtunidad pa juda e hobennan aki asina motivanan pa sigui riba e bon caminda y cu mester por ta un ehempel pa otro hobennan den comunidad. Aruba Lions Club a cubri tur gastonan di e grabacion aki pa finalmente den December por a hasi entrega oficial di e produccion na e grupo aki cu ta yama nan mes “The Rokkeros”. Esaki tawata un trabou di algun siman den studio di grabacion y pa finalmente e hobennan a keda feliz cu nan produccion cu pronto lo por ser scucha na nos radionan local.
Den un otro bunita gesto, manera ta conoci cu faltando algun dia pa aña termina, un candela feroz a destrui un cas por completo den Sta Cruz y laga un pareha di edad avansa sin un dak y claro a perde tur locual cu nan tawata tin y hasta a keda herida.
Pa esaki tambe Aruba Lions Club hunto cu Flatstone Supermarket na Piedra Plat a hasi entrega di un suma na voucher cu e pareha aki por tin algun tempo pa buska productonan di prome nececidad durante e tempo dificil aki.
Aruba Lions Club kier a gradici Flatstone Supermarket na Piedra Plat cu tambe a juda den esaki y sigur den nomber di tur su miembronan desea e pareha un pronto recuperacion y sperando cu e gesto aki ta di un bon ayudo pa nan.
Alavez Aruba Lions Club ta spera cu den 2024 por sigui conta cu e contribucion di comunidad y comercio pa asina nan por sigui juda tur caminda cu por y cu su miembronan voluntario sirbiendo comunidad.
