Aruba Lions Club su Smile Mobile tabata activo den Fin di Siman

Cuido Dental ta masha importante pa asina evita diferente malesa. Durante Fin di Siman, e Smile Mobile di Aruba Lions Club tabata activo un biaha mas pa asina haci un chequeo di e dentadura of planchanan di nos grandinan.

Smile Mobile a bishita Diasabra Centro di Cuido San Nicolaas parti mainta y parti atardi a bishita Huize Maristella na Savaneta. Diadomingo a bishita San Pedro y Sint Micheal Pavilioen na Playa y atardi a bishita Fundacion Paraiso na Catashi.

Denturista Igor Croes y Magaly Franken a haci e chequeo di e djientenan prostatico pa mira si tur cos tabata na ordo y esunnan cu tabata falta limpieza y algun reparacion a haci esakinan den forma gratuito. Great pa destaca presencia di e team young di Aruba Lions cu ta e Leo’s nan cu tambe a join e dia aki pa duna asistencia. Mester menciona cu asta Dr. Edward Cheung a compart un rato den e smile mobile y a keda masha facina cu e trabou di e SMILE MOBILE.

Aruba Lions Club ta masha contento di por aporta na salud di nos grandinan y lo sigui pronto cu mas di e servicionan aki pa nos comunidad cu nos Smile Mobile , Aruba Lions Club pa 75 aña caba sirbiendo nos comunidad. Gradicimento ta bay na Igor Croes, Magalie Franken, Phillipe Hese y tambe na e team di Leo’s. Aruba Lions Club … WE SERVE