Aruba Lions Club a ricibi “CLUB EXCELLENCE AWARD”

Aruba Lions Club, mas cu 75 aña sirbiendo comunidad di Aruba, recientemente a cuminsa cu e aña leonistico 2023 – 2024 cu ta core di 1 July 2023 pa 30 Juni 2024 y e Board nobo ta cla y motiva pa sigui haci proyectonan pa nos comunidad. 

Un bunita noticia cu Aruba Lions Club kier comparti cu tur su miembronan y tambe cu Pueblo en general paso ta danki pa ayudo cu nos ta haña di nos hendenan nos por sigui haci e trabounan voluntario aki den nos comunidad. Pesey mes Aruba Lions Club ta contento di por anuncia cu e Club a ricibi e premio di excelencia “CLUB EXCELLENCE AWARD” pa e aña Leonistico 2021 – 2022 bou liderazgo di e tempo ey Presidente Aysa Magaly Franken.  

E “Club Excellence Award” ta e manera ideal pa asina pone e Club den e caminda di exito continuo y di gana prestigio pa asina haci un trabou excelente pa loke ta trata miembrecia, servicio, liderazgo, organisatorio y mercadeo. 

Pa ricibi e galardon aki e club mester por cumpli cu e requisitonan cu Lions Club International ta exigi.  Cual ta

• Miembrecia : Aki ta unda e Club mester demostra un crecemento den su miembronan den e aña Leonistico 

• Servicio : Haci un contribucion na Lions Club International Foundation cual fondonan ta ser usa ora di cualquier calamidad na nivel international,  pero tambe si e Club a Brinda servicio of a haci un projecto cual ta ser concidera un causa humanitario.  Entrega lista di actividadnan cu e club ta participa den dje y despues raporta esaki na Lions Club International. 

• Lidera y Organiza,  esaki  ta nifica cu e Club semper mester keda den un bon balance , pues pa tur miembro cumpli cu nan responsabilidadnan, reporta tur cos cu ta pasa den bo Club na Lions Club International y percura pa e miembronan di Club semper keda activo y motiva pa sigui yuda e causa cual ta e comunidad. 

• Mercadeo, esaki ta unda cu e Club ta saca un relato den prensa of rednan social tocante nan actividadnan pa asina mantene e pueblo tambe informa kico nan ta haciendo 

Ta parti di Aruba Lions Club ta nifica cu bo ta parti di un causa humano, un causa noble unda abo como ser humano ta duna bo tempo y bo oranan liber pa dedica esaki na un causa bunita y unico. Ta parti di Aruba Lions Club ta un privilegio y un honor grandi. Nos tin 75 aña caba sirbiendo e comunidad aki y nos lo sigui haci esaki tambe.  Ya caba e informacion pa aña Lionsistico 2022 – 2023 a ser manda pa Lions Club International pa wak di Aruba Lions Club ta bolbe ricibi e Award aki . Pabien na tur miembro di Aruba Lions Cub.