Ku firma di e promé ministernan di Aruba, Kòrsou i Sint Maarten i e Sekretario di estado di Relashonnan den Reino bou di un akuerdo mutuo nobo, a pone e base hurídiko pa kolaborashon duradero riba e reformanan den sektor públiko di e paisnan Karibense den Reino. Ademas di e reformanan finansiero, ekonómiko i sosial, ta trata aki tambe di reformanan den enseñansa, kuido i fortifikashon di e estado di derecho.
E reformanan aki ta den ehekushon ya pa dos aña kaba a base di e paketenan di pais di e paisnan Karibense. Meta di esaki ta pa alsa e resiliensia ekonómiko i forsa ehekutivo di e paisnan na interes di su abitantenan. Esaki ta nesesario, pa motibu ku e pandemia di corona a hasi vulnerabilidat di e paisnan pa kontratempu ekonómiko i ku esaki e nesesidat di reforma visibel.
E akuerdo mutuo nobo ta e instrumento ku ta utilisá pa un kolaborashon duradero dentro di Reino. E akuerdo ta basá riba igualdat, propiedat i komunalidat. Tambe ta papia di kompromiso mutuo. Por ehèmpel, e gobièrnu di Aruba, Kòrsou i Sint Maarten a komprometé pa traha riba e reformanan durante kuater aña. Hulanda di su parti ta komprometé pa brinda sosten na unda esaki ta nesesario. Pone kapasidat di ehekushon i rekurso finansiero disponibel ta e forma den kua esaki lo sosodé.
A base di akuerdo mutuo nobo kada pais Karibense di Reino riba su mes, huntu ku Hulanda, lo elaborá riba diferente agènda di ehekushon. Den esaki tin medida i proyekto pa realisá e reformanan ku ke logra den sektor públiko. Implementashon di e reformanan ta prinsipalmente responsabilidat di e gobièrnu di e pais. Responsabilidat di kordinashon di e ehekushon di e reformanan na e paisnan Karibense ta kai bou di e minister di Asuntunan General i e organisashonnan di ehekushon ku ta kai bou di su ministerio. Na Hulanda e kordinashon ta kai bou di e ministerio di Asuntunan Interior i Relashonnan den Reino i e ehekushon bou di Tijdelijke Werkorganisatie (TWO).
E método di trabou aki ta korespondé na e forma kon e paisnan dentro di Reino a kolaborá ku otro riba e reformanan e último dos añanan. E areglo mutuo ta remplasá e lei di konsenso di Reino (COHO, Caribisch Orgaan voor Hervorming en Ontwikkeling).