Aruba Internacional Regatta tabata dos dia di evento den e fin di siman cu a pasa. Rik van den Vaart cu ta e motor tras di e evento aki ta duna di conoce cu a pasa dos dia fuerte di competencia riba lama di sufside unda cu tabatin 14 clase di belador di botonan miniatura te na yate di race.
Por bisa cu tur hende cu a participa a gosa masha hopi mes. Aña pa aña e regatta ta bira mas grandi, aña pasa tabatin 70 belador y e aña aki tabatin 85 sin conta esunnan cu ta riba e yatenan. Segun Rik van den Vaart por bisa cu tabatin mas cu 85 belador riba lama den e dos dianan den fin di siman cu a pasa.
E bunitesa di esaki ta tambe cu na momento cu tin personanan cu ta pasa banda di lama por mira e bunitesa di e belanan cu ta riba awa e tabata masha bunita mes pa por mira. No ta solamente hende grandi a participa den e competencia di boto di bela, pero tambe e muchanan di 8 aña bay ariba a forma parti di e evento aki. E muchanan por a gosa pero por a mira con nan ta domina e deporte di bela cu nan ta gusta. E aña aki a participa mas of menos 40 mucha di Aruba.
Tambe un turista mucha homber di 10 aña a bini te for di Merca pa por competi na Aruba e hoben a bin for di florida, na momento cu a scucha di e evento internacional Regatta 2024 e la puntra su mayornan si ta posibel cu e por bay Aruba y competi y e mayornan a apoya nan yiu den esaki y a bin competi cu e otro muchanan di Aruba y hasta a gana premio.
Esaki sigur ta e logro pa Aruba Internacional Regatta cu e deporte di bela por trece hopi deportistanan internacional cu ta gusta e deporte di bela. Rik van den Vaart ta spera cu otro aña nan por haya mas hende di Merca cu lo bini Aruba y competi den Aruba Internacional Regatta. Pa Rik mes esaki ta un desaroyo interesante unda cu ta spera cu por haya hopi mas deportistanan internacional hunto cu esunnan di Aruba competi den nivelnan aki na Aruba.
E team di Aruba Internacional Regatta ta kere den sport Tourism y ta kere den naturalesa, hende y deporte, Segun Rik van den Vaart e tres puntonan aki hunto ta forma e Regatta. Ta trata di trece hende hunto pa haci deporte riba nos naturalesa unda ta educa y conserva e naturalesa di Aruba y e deporte di belador no ta un deporte sano pa e deportista pero pa e naturalesa tambe.
Asina ta forma parti di e naturalesa y ta sinti e forsa di naturalesa tambe. E adultonan no a keda afo nan tambe a competi y e competencia tabata basta fuerte. SIWA ta un fundacion di belador y conhuntamente cu Fundacion Rancho a organisa full e regatta. Sinembargo tabatin hopi hende tras di e dos fundacionnan aki cu ta duna e sosten y sigur tur e sponsornan cu a haci posibel cu e evento ta un exito completo.
