ORANJESTAD,Aruba
Aruba Excellence Foundation (A.E.F.) a cuminsa ofrece desde 21 di April e curso di Aruba Certification Program, cual tambe ta conoci como ‘Mi Compromiso’ online. A ranka sali cu e prome 6 klasnan virtual, cual a conta cu un total di 113 participante.
Debi na e situacion actual cu tin un medida di ‘Shelter in place’ y cu hopi hende ta na cas, A.E.F. hunto cu e apoyo y sosten di Aruba Tourism Authority (A.T.A.), a ahusta e contenido di e programa di certificacion pa provee e curso online y ofrece esaki temporalmente gratuito. Asina cada persona cu ta interesa pa engrandece su conocemento di Aruba tin e oportunidad pa haci e curso online den comodidad di su cas. Nos a ricibi mas di 900 registracion, y diariamente nos ta ricibi mas registracion aserca. A.E.F. ta sumamente satisfecho cu e acogida y e interes demostra den ‘Mi Compromiso’ online.
Con e curso ta tuma luga?
E curso ta wordo presenta na Papiamento online via di e plataforma Zoom. Tin 5 sesion en total y cada un tin un duracion di 45 minuut. E participante ta ricibi tur informacion por medio di email di antemano pa asina e por participa.
E presentacion ta wordo presenta dos biaha pa siman, pues den dos siman y mei e participante ta bira ‘Aruba Certified’.
Con pa registra?
Pa registra por bishita nos pagina http://www.acp.aw/en/register/ y unabes cu registra lo ricibi mas detaye tocante con pa participa cu e curso. Tuma nota cu cupo pa participantenan ta limita y esnan cu yega prome ta ‘bebe awa limpi’!
Pa mas informacion por manda un email na info@acp.aw of yama na 280-2924.
Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.).
Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.
-FIN-
