Na 2015 Gobierno di e tempo ey a bini cu un proyecto di tram pa revitalisa centro di ciudad. A bini cu e idea di tram of streetcar cu su ehecucion a costa mas di 44 miyon florin y te ainda no a duna resultado.
Ta shete aña caba desde cu Gabinete Mike Eman I a bini cu algo cu pa cuminsa nunca a wordo uza na Aruba. Pero e splica cu a duna e tempo ey ta cu e tram of streetcarnan, cu tabata tres en total, lo mester percura pa un fluho constante di bishitantenan por bishita centro di ciudad di Oranjestad.
Nunca Aruba den su historia desde descubrimento a conoce uzo di tram di e forma aki. E ta algo cu ta wordo uza na paisnan grandi, pero pa transporte di personanan di un destinacion pa otro.
Aki na Aruba e trip den e tram, cu a costa mas di 40 miyon florin, ta un distancia cu un turista for di waf di Aruba lo por cana y yega centro di ciudad den minuut. Un turista canando lo a haya un miho bista di tur e otro negoshinan cu tin riba e ruta aki, cu tambe ta forma parti di e comercio di Aruba. Por bisa cu durante e periodo cu e tram a funciona, a cera e acceso na e otro negoshinan aki.
Introduccion di e streetcar no tabata e solucion pa hiba mas hende den caya, mientras cu na mesun momento a kibra cu un tradicion di siglo cu autonan ta pasa den caya y ta probecha pa di e forma aki mira loke cu tin den centro di ciudad.
Awo a dicidi di habri caya grandi pa trafico atrobe. E pregunta ta: kico lo bay haci cu e tramnan ken? Kende ta bay para responsabel pa e gastonan haci aki. Banda cu e tramnan aki nunca a genera ni 1 dollar pa Aruba, ya cu no mester a paga nada pa subi abordo, y ainda e inversion haci den esaki ta forma parti di e debe grandi cu Aruba tin.
Gobierno a dicidi awo di habri caya grandi pa trafico, cu pa un grupo ta wordo mira como un bon iniciativa. Pero kico ta bay haci cu e tramnan mes.
Ademas, ora cu a crea e famoso departamento di Arutram, a dicidi di hinca esaki bou di Arubus, cu tabata un compania cu problema financiero caba y a haci esaki mas grandi. Arutram no tabata genera ningun entrada real pa Arubus.
Awo e pregunta: Kende ta bay para responsabel? Mester haci algo pa pone responsabilidad riba lomba di esun(nan) cu a biba den un mundo di fantasia cu e proyecto di streetcar aki na Aruba.