Den e curso cu Fundacion SIKI a lanza pa 3 di september venidero titulo ‘Con pa goberna un pais’, pa prome biaha lo expone e secreto publico den nos sistema politico-democratico. Asina sr. doctor Jayburtt Dijkhoff, presidente di Fundacion SIKI a elabora. E investigacion haci a mustra cu ounke Aruba a deshaci di e dominio di Hulanda y Corsow, ainda e herarkia colonialista ta bibo den nos sociedad. E ta asina fuerte cu esaki ta domina e ramo di politica y comercio. Basicamente nos tin un elite cu ta dicta y e pueblo cu tin cu acepta locual ta bin di ariba. Esaki ta foumenta un cultura di miedo y di desconfiansa. Hende tin miedo di papia abiertamente kico nan ta pensa, corda pa participa na e democracia berdadero den nos pais. Esaki ta riba tur frontera, incluyendo medio di comunicacion, cual ta sumamente preocupante pa e formacion di pensamento liber y expresion liber den nos sociedad. Ni comercio no ta realmente independiente, pasobra nan ta na merced di e elite pa tene cuenta cu nan y yuda nan cu un ambiente di establece negoshi y crecemento economico. Comercio ta sinti cu nan no ta wordo scucha debidamente ora cu gobierno ta tuma decisicionnan. No ta importa e signatura, colo politico of gabinete. E problema ta sistematico, kiermen tur ta haci mescos. Esaki ta haci cu nos ta den un situacion sumamente peligroso como pais. E herarkia colonialista cu a keda atras a hiba cu awor nos tin un elite dominante den nos sistema democratico, pero no ta mara na un persona. Basicamente, ken cu sinta riba e stoelnan di mas halto, ta comporta mescos. E ta parti di e reglanan formal y vooral informal. Den un palabra: ela bira algo cultural. Esaki ta haci cu nos no por papia di un dictador, pero un sistema corumpi cu ta haci cu tur gobierno ta mustra e mesun caracteristica din un sistema tiranico. Miedo pa represaya y fieldad ciego na e elite ta domina full e panorama. Cualkier critica ta bira un atake personal contra e gobierno of un mandatario. Esaki ta funesto pa un democracia y a hiba na pobresa extremo. E ta haci nos pais vulnerabel di paden y tambe pa menasa di pafor. Pero nos no ta laat. Nos por cambia e rumbo di nos pais. Pesey sr. Jayburtt Dijkhoff ta invita henter pueblo di Aruba pa acudi na e curso importante aki pa nos futuro. Aruba tin mester di nos tur.
Aruba conoce un forma di tirania pasivo
