Despues cu nos a anuncia e fechanan di Aruba Bank su di 17 edicion di Walk & Run, hopi ta esnan cu a cuminsa entrena pa e evento di 4 dia aki. Ayera a tuma luga e prome dia di e famoso Aruba Bank Walk and Run 2023. Esaki a cuminsa exitosamente cu un participacion grandi di personan coriendo y canando riba e ruta na San Nicolas.
E ruta pa yega Joe Laveist tabata druk desde trempan, cu participantenan bayendo ariba pa participa den e prome dia di Aruba Bank Walk and Run 2023. Pa 6:30pm en punto e participantenan a cuminsa core y cana e distancia di 5.5KM. Por a mira un massa di hende cu a scohe pa traha riba nan mes, manera e lema di e aña aki ta bisa: “Be A Better You”. Hopi hende conscientemente a tuma e decision di biba un bida mas saludabel.
E participantenan tabata feliz di a completa e prome dia y tabata ansioso pa participa den e proximo 3 dianan. Manera añanan anterior, participantenan mes a bai cu nan boter di awa pa asina disminui e cantidad di desperdicio di cups riba caminda. Aruba Bank e ta orguyoso pa mira cu hendenan ta mantene e evento plastic free.
E di dos dia di Walk & Run ta na Aruba Bank Hato Branch y tambe lo sali pa exactamente pa 6:30PM. Pa tur esnan cu ta haci uzo di e ATM of Smart deposit machine ta bon pa tene na cuenta cu riba e dia aki e lo no ta accesibel cu auto.
Aruba Bank ta recorda tur hende pa bisti keds confortabel, keda hidrata y trece bo boter di awa. Download e Walk & Run App pa ricibi resultadonan live, pero tambe pa sigui bo participantenan preferi. Tambe por car- pool pa asina alivia e trafico durante e siguiente dianan. Un invitacion na pueblo di Aruba pa para banda di caminda y apoya e coredornan pa nan yega final di e di 17 edicion di Aruba Bank Walk & Run 2023.
