30 aña pasa, ‘Blue World Travel Corp’ a cuminsa cu ‘Festival at Sea’; biahenan riba crusero pa biaheronan Afro-Americano. Un biaha pa aña nan tawata bishita diferente puerto y tawata probecha di nan tempo hunto pa haci diferente actividad y celebra nan cultura. Den algun aña e grupo aki a crece y te cu dia di awe nan ta charter e crucero completo cu nan biaha riba dje.
28 aña pasa e organisacion aki a cuminsa haci un colecta di buki pa mucha entre su biaheronan y a cuminsa entrega e bukinan aki na diferente destino riba nan itinerario pa e muchanan cu ta biba na e destino y di e forma ey promove e amor pa lesamento.
‘Festival at Sea’ a yega di bishita Aruba caba den pasado, pero na 2022 pa prome biaha a escohe Aruba pa ricibi nan donacion di buki. Dia 21 di juli, e organisacion Festival at Sea a haci entrega di bukinan pa mucha na Aruba ora nan a yega cu e crucero Celebrity Equinox.
Cu hopi placer e departamento di Crucero di Aruba Tourism Authority conhuntamente cu Aruba Ports Authority y SEL Maduro a ricibi e bukinan aki y a keda encarga pa distribui esakinan na diferente scol rond di Aruba.
Diabierna dia 2 di september, iniciando luna di turismo, representantenan di A.T.A., APA y SEL Maduro a haci entrega di aproximadamente 1000 buki na 41 diferente scol na Aruba. Tambe a entrega bukinan na Biblioteca Nacional na Oranjestad y San Nicolas. A scoge pa haci e entrega oficial di e prome bukinan na Colegio Santa Teresita na San Nicolas, mirando cu nan lo ta inaugurando nan biblioteca di scol pronto.
Aruba Tourism Authority, Aruba Ports Authority y SEL Maduro ta agradecido na ‘Festival at Sea’ pa e bunita gesto aki y tambe na SKOA, Biblioteca Nacional y tur scol cu a habri nan portanan pa e cooperacion y pa ricibi e donacion aki.
