Na januari 2022 Aruba a yega na un recuperacion si 63%
Aruba Tourism Authority ta informa cu pa luna di januari nos destinacion a ricibi un total di 59,793 bishitante “stay-over”. Si compara luna di januari 2022 cu januari 2019 – cu tabata e ultimo aña normal di turismo, por mira cu Aruba a recupera cu 63% di locual a wordo ricibi na januari 2019.
E tres mercadonan cu mas a destaca den e cantidad di turista cu a bishita na januari 2022 como tambe den grado di recuperacion ta; Estados Unidos cu 45,556 bishitante cu ta representa un grado di recuperacion di 69.6% den comparacion cu januari 2019, Hulanda cu 4,079 bishitante cu ta representa un grado di recuperacion di 98.2% den comparacion cu januari 2019 y Colombia cu 2,173 bishitante cu ta ta representa un grado di recuperacion di 65.3% den comparacion cu januari 2019.
Norte America ta keda e mercado mas fuerte pa Aruba y na januari 2022 un total di 48,000 bishitante Norte Americano a bishita Aruba. Esaki ta 80.3% di e total di e bishitantenan “stayover”. Na januari 2022, Europa a trece 5,871 bishitante pa Aruba, cu ta 9.8% di e total di bishitantenan “stayover”. Un total di 4,695 bishitante cu ta representa 7.9% di e bishitantenan “stayover” tabata procedente di Latino America; y 2.1% di e total di bishitantenan stayover pa januari 2022- cu ta 1,227 bishitante, a bishita nos isla for di otro partinan di mundo.
COMPARACION CU 2021
Manera previamente menciona, aña 2021 a pone e “tono” pa y a marca e cuminsamento di un etapa continuo di recuperacion di e pilar mas importante di Aruba su economia a pesar cu e tabata un aña cu algun reto.
Algun di e retonan cu a mira den 2021 a afecta e comienso di 2022 tambe, manera entre otro e ola di Omicron, protocol di test pa drenta Aruba, Aruba riba e lista di “Level 4” di CDC na Estados Unidos y tambe protocolnan di re-admision di parti di varios pais pa ora e turistanan bolbe nan pais di origen.
Manera previamente anuncia, e retonan aki a afecta e proyeccion original pa 2022 y por wordo mira den e cifranan di januari 2022 mirando cu a perde 42% di cantidad di bishitante cu a wordo proyecta originalmente pa januari 2022.
Por nota si cu 2022 a cuminsa cu un crecemento mas fuerte y stabil cu 2021.
Si compara januari 2022 cu januari 2021 por wak cu crecemento di 90.6% den cantidad di bishitantenan “stayover”, for di 31,374 bishitante pa 59,793 bishitante.
Si compara januari 2022 cu januari 2021 por wak un biaha mas cu e 3 mercadonan cu mas a crece den cantidad di bishitante stayover ta Estados Unidos cu un crecemento di 19,332 bishitante “stayover” cu ta representa un crecemento di 73.7%, Hulanda cu un crecemento di 3,028 bishitante “stayover” cu ta representa un crecemento di 288.1% y Colombia cu un crecemento di 1,117 bishitante “stayover” cu ta representa un crecemento di 105.8%.
TOURISM CREDITS / CENTRAL BANK OF ARUBA
Di acuerdo cu Banco Central e asina yama ‘Tourism Credits’ (anteriormente yama “Tourism Receipts”) pa e prome y di dos kwartaal di aña 2021 a contribui cu AWG 1279.1 miyon den nos economia, cu ta 9% mas compara cu e mesun temporada na 2020. Esaki naturalmente ta debi na e pandemia global di Covid-19 durante cual Aruba tambe a cera su fronteranan temporalmente entre mita di maart 2020 te cu juli 2020.
Aruba ta sigui recupera desde e re-apertura di nos frontera na juli 2020. No obstante retonan cu a encontra na caminda, tin e confiansa cu lo continua riba e trayecto di recuperacion den 2022.
