Minister di Enseñansa dr. Rudy Lampe a firma un acuerdo cu Consul General pa Aruba staciona na Corsou Allen S. Greenberg un acuerdo na beneficio di studiantenan di Aruba. E ta un Memorandum of Understanding. “Awe ta un momento di alegria pa educacion na Aruba,” e mandatario a cuminsa pa splica.
Sr. Greenberg a representa Departamento di Estado di Gobierno Mericano den firmamento di extension di e MoU. E prome biaha tabata un aña pasa y e resultado tabata positivo. Esaki ta motibo cu a firma e extension pa cuatro (4) aña cu ya caba ta mustra e exito di e programa.
Minister Lampe a splica cu for di aña pasa cu a informa cu e sistema di enseñansa ta cuminsa uza e sistema Mericano, a constata “tin un explosion di interes pa estudionan Mericano. E cantidad di peticion pa studia na Merca ta expandiendo grandemente.”
Tur hobennan interesa pa studia na Merca por haya informa na J.F.K. Education Center of por haya e informacion aki online. Inclusive, algun siman atras Ministerio di Enseñansa a firma un MoU cu Montgomery College pa un cooperacion cu EPO. Montgomory ta un di e community collegenan di mas grandi na Maryland y ta bay yuda Aruba cu preparacion di maestronan riba e estudio online. Y banda di esaki ta bay prepara un Associate Degree den Cyber Security cu lo wordo duna for di Aruba (EPI) pa studiantenan den region. SETAR lo ta cooperando den esaki tambe. “E ta muestra cu e cooperacion entre institucionnan educativo di Merca y Aruba ta creciendo.”
Den cuadro di e acuerdonan ariba menciona, ta bay mehora preparacion di e studiantenan cu ta bay sigui nan estudio avansa na Merca. E preparacion previo ta hopi importante y p’esey e scolnan cu ta uza plataforma digital na Ingles, ta birando popular bou di hobennan. Si nan sigui nan estudio di Highschool na un di e scolnan aki di plataforma Ingles, nan lo ta miho prepara ora cu yega Merca. Hasta Hulanda a cuminsa na Americanisa su estudionan. “Merca ta birando un pais lider pa loke ta educacion. Aruba ta un di e prome nan den Caribe cu a gara e oportunidad pa e cooperacion na nivel educativo entre Merca y Aruba.”
E rol di Gobierno di Aruba ta pa pone un team y recursonan disponibel pa duna bida na e MoU cu a firma dialuna mainta. Un grupo di trahado di Universidad di Aruba cu ta entrena den enseñansa na Merca lo duna apoyo na e centro cu ta habri tur dia pa atende cu publico. Merca mester percura pa material necesario pa Edu(cation) Center.
Consul General Allen Green tambe a expresa alegria y satisfaccion pa extension di e MOU. E tipo di cooperacion aki ta un inversion di largo plaso. Cu e pandemia ta dificil pa studiantenan biaha pa haya e informacion di studia na Merca. Pa medio di e tipo cooperacion aki, tur informacion na alcanse di nan mannan aki na Aruba mes.
