Un multitud a presenta diadomingo na Club Caiquetio pa bin bisa Harry te despues. Diadomingo ultimo riba su fecha natal cu e lo a cumpli 75 aña, Ministerio di Cultura hunto cu Departamento di Cultura a organisa un Homenahe Postumo na Sr. Harry Croes den felis memoria.
For di prome cu 6 or di atardi un gran cantidad di famia, amigo, conocirnan a yega Club Caiquetio pa duna condolencia y despedi di Harry Croes. E club caminda mayoria di e festivalnan organisa pa Harry Croes a tuma luga a yena cu un multitud cu a bin bisa Harry te despues.
E comision encarga a prepara un bunita programa. Na yegada di e shers cu tabata transporta Sr. Harry Croes den felis memoria, e prome maestro di ceremonia Sr. Bryan Dirksz a anuncia e presentacion di Ruth Gaarie cu a interpreta e cancion “Ora bo waak na shelo”, cual tabata uno hopi emocional. A sigui cu presentacion di Caha di Orgel di Sr. Nelson Thiel cu varios piezanan musical. Sr. Johnny Scharbaay tambe a haci un bunita presentacion ariba piano. E ganador di Festival “Un Canto na Aruba su Himno y Bandera 2023”, Sra. Ghislaine Grant cu su tremendo bos a presenta su cancion ganador cual ta “E bida akinan”.
Den e segundo parti di e programa Sra. Esmeralda Tromp a fungi como Maestro di Ceremonia, e la anuncia presentacion di otro gran cantante, Jose David Polanco cu a interpreta e cancion “Bo a bay cu mi angel”. Sra. Margaritha Henricus a declama un bunita poesia. A pasa un video di Minister di Cultura, kende no por tabata presenta pa motibo di compromiso di rabao den exterior. Den e video a mandatario a expresa palabra di convivencia y condolencia na henter famia y amistadnan. A sigui cu e parti oficial caminda nos Himno di Aruba a wordo interpreta pa nos gran cantante Sr. Oslin Trimon.
E prome discurso a wordo haci pa Minister di Educacion y Deporte Sr. Endy Croes kende a repasa e.o. e trayectoria y logronan riba tereno deportivo di Harry Croes y tambe den e ramo di prensa. Prome Minister di Aruba Sra. Evelyn Wever-Croes a representa Minister di Cultura Sra. Xiomara Maduro. Prome Minister den su discurso a gradici Harry Croes, e gran arubiano cu a stima nos pais. A expresa gratitud tambe Harry su famia pa tur loke Harry a hasi pa Pais Aruba pero muy especial den e ramo cultural.
Despues di e parti oficial e programa a continua y Departamento di Cultura hunto cu Teatro Aruba bao direccion di Jhon Freddy Montoya a presenta un bunita obra cu e titulo “Shon di Hende”, un bunita homenahe describiendo e Shon di Hende cu Harry Croes tabata ta. E anochi a sigui cu presentacion di e hoben cantante Jorienne Angela, cu a resona su bunita bos cu e cancion “ Mi nomber ta Aruba”.
Despues Jorienne hunto cu su mama Joanne a presenta hunto un tremendo potpourri di cancionnan di nos pais y acompaña en bibo cu piano di Johnny Scarbaai. E ultimo parti di e programa Sr. Ivan Kelie Jr. tabata e Maestro di Ceremonia y na su turno a anuncia presentacion di varios pieza musical di Tipico Zonido di Antaño bao direccion di Mario Kelly Jr.
Na parti final di e presentacion di Zonido di Antaño ta toca un “Dande” y djey un cantidad grandi di musiconan y cantantenan di Dande ta uni. Musiconan cu nan instrumento a forma e grupo di Dande di mas grandi di historia y a toca acustico y a wordo acompaña pa un cantidad di Rey-, Reina- y Cantantenan di Dande cu a presenta nan dande mientras cu Harry Croes tabata bandona Club Caiquetio den e shers. Esaki tabata un momento hopi emocial yen di lagrimanan pa famia, amigo-, cantante-, musiconan y tur esnan presente, convivi e despedida di Harry cu un “Dande”. Dande, nos tradicion di fin di aña cual Harry Croes a rescata, preserva y promove pa mas di 50 aña pa medio di su festivalnan.
Minister di Cultura Xiomara Maduro ta yama danki na un y tur cu coopera di nan curason pa por duna Sr. Harry Croes un bunita homenahe. Danki na prome luga na famia di Harry Croes pa e permiti Gobierno di Aruba organisa e homenahe. Danki special ta bay na Club Caiquetio, Express Events & Party Rentals Sr. Carlos Odor y su personal, Aurora Funeral Home, Telearuba, Rode Kruis, Bureau Minister di Finansa y Cultura, Departamento di Cultura Aruba, VIP Radio, Radio Bo Guia, Bo Informado, Radio Top FM, Canal 22 y tur otro medionan di prensa y social cu a transmiti e homenahe na Harry Croes den felis memoria.
Palabra di danki na nos mandatarionan cu a duna un discurso, Prome Minister Sra. Evelyn Wever- Croes cu a representa Minister di Finansa y Cultura Sra. Xiomara Maduro, cu pa motibo di trabao tabata den exterior, Minister di Educacion y Deporte Sr. Endy Croes, e Maestronan di Ceremonia Sr. Bryan Dirksz, Sra. Esmeralda Tromp y Sr. Ivan Kellie Jr. Un danki na tur musico y cantantenan, mucho hopi pa menciona, masha danki pa e bunita presentacion.
Di e forma aki Ministerio di Cultura y e mundo cultural a yama danki na un Baluarte di nos cultura, Sr. Harry Croes den felis memoria, pa a sa di mantene y promove nos folklore y nos Festival di Dande pa 50 aña y 26 aña Festival “Un Canta na Aruba su Himno y Bandera”. Harry a siña nos conserva y biba nos cultura. Den nos mente y curason nos lo keda corda Harry pa semper. Cu Harry sosega na paz.
