Cualkier persona cu a yega di sigui un tratamento di ley den Parlamento mi ta sigur cu lo keda decepciona y confundi. Decepciona pa e nivel y calidad di discussion y confundi pasobra mayoria di loke e coalicion MEP-RAIZ y e ministernan a papia no ta relata na e ley o tema cu ta wordo discuti.
Parlamentario nan ta haya e oportunidad di haci pregunta y comentario na e minister (nan) presente. E parlamentario den su cas ta haya tempo limita pa haci su pregunta nan y expone su ponencia pero e minister nan ta haya tempo inlimita pa bagatalisa e parlamentario nan cu ta tribi di cuestiona e gobernante nan y nan maneho.
E tactica aplica no ta nada nobo y tin un nomber esta “ad hominem”.
Ad hominem ta ora bo dirigi bo atake directamente riba e persona na lugar di responde na su argumento. E meta ta pa desbarata e persona su caracter cu e speransa cu ta debilita of nulifica su argumento. Door di pone e enfoke riba e persona y trata na bahatilisa su caracter ta kita e atencion di e tema y argumento nan.
Mas tristo den tur esaki ta cu nos tin presidente di parlamento cu ta yena su boca cu cambio y hisa nivel di Parlamento pero ta permiti tipo di drama asina tuma lugar den sala di parlamento. Pueblo kier sigui e discussion nan den Parlamento pero ta hopi dificil pa keda conecta ora e nivel di discussion ta abou. Coalicion MEP-RAIZ ta haci Parlamento e cas di pueblo un berguensa. Supuestamento Parlamento tey pa controla gobierno y representa e pueblo pero no tin transparencia y parlamentario nan derecho di haya inzage ta wordo limita door di e mesun gobierno cu nan tin cu controla.
Parlamentario nan cada biaha ta perde un oportunidad pa informa y educa pueblo di e consecuencia y/of benificio di e ley nan cu ta wordo trata. Na final di cada session pueblo ta keda ta cu un dolor di cabez di ken a haci kiko cuanto ana pasa y ken ta mas lardon cu ken etc.
Divide and conquer ta e strategia di MEP/Raiz. Semper ta pone un grupo contra otro pa asina nan logra nan meta. Permiti mi duna un par di ehempel.
1.Durante pandemia a kita 12.6% di trahador nan di gobierno, di overheids NV’s y stichtingen. Gobierno a pone sector priva contra sector publico bisando cu 35.000 trahador no por sufri pa 5.000 trahador. 2.Ultimo siman nan a pone henter pueblo contra e trahador nan den top di algun empresa. Minister presidente a bisa cu 10 pa 20 trahador nan supuesto salario halto ta stroba 5.000 ambtenaar di haya 5% di e 12.6% bek.
E prome dos medida MEP y Raiz a pasa sin considera e dolor cu ta causa na e trahado. E di tres medidad contra clase trahador ta na caminda. Mi ta ansioso pa sa cua ta grupo nan cu MEP/Raiz lo pone contra otro ora di trata e di tres medida cu ta e flexibilisacion di ley nan laboral.
