Loke a pasando na e momentonan aki cu medidanan anuncia dor di AZV, no ta algo nobo, ya cu ta for di aña pasa e medidanan aki a drenta na vigor pero ora cu Prome Minister como lider di MEP, a realisa cu e medidanan aki lo por tin consecuencia pa eleccion di juni 2021, el a dicidi di suspende esakinan pa laga eleccion pasa.
Arthur Dowers miembro di fraccion di AVP den Parlamento, a mustra cu pueblo di Aruba tin un Prome Minister den persona di Evelyn Wever Croes, un politico cu ta cana tur caminda c’un piñata pa pueblo, no cu sorpresa y cosnan alegre pero un piñata di mentira y medida.
“Mi ta bisa e piñata di Evelyn Wever Croes, ya cu su persona ta mara na tur loke ta pasando den gobernacion ya cu su persona cinco aña pasa a bay eleccion bisando pueblo cu e ta bay goberna cu shete Minister y hasta bisando cu e partido cu no kier traha cu shete Minister, lo no por traha cu Evelyn Wever Croes.
El a gaña pueblo for di e tempo ey caba, ya cu el a drenta gobierno, brasa Otmar Oduber, nan a baila y festeha, un honymoon cu a dura algo mas cu dos aña, mustrando contento cu e por a bira Prome Minister danki na Otmar.
Si e mesun Otmar cu el a yama politico stinki, politico corupto, esun cu el a duna e apodo di ‘strawberry gate’ el a bira forma gobierno cune, gañando pueblo cu e lo bay cu shete minister pero a cambia pa ocho minister.
Aworaki, Evelyn a bolbe forma un gobierno nobo, caminda no tabatin ningun presion di su amigo Otmar Oduber pa e bay cu ocho Minister pero mi ta kere cu e biaha aki e presion a bin for di den su propio seno pa bay cu ocho, pues e mester a mantene ocho minister, apesar di hunga duro den pasado cu esun cu kier traha cu Evelyn tin cu acepta shete minister.
El a bisa pueblo e tempo ey cu si e bay cu shete minister, e lo spaar 50 miyon florin kitando un minister y awor e ta bin bisa pueblo cu e tin cu corta 60 miyon den AZV, e por a keda sin bin cu e di ocho minister, keda sin bin cu e extra minister y e suma di 50 miyon cu el a bisa e lo spaar.
Evelyn Wever Croes e biaha aki a forma un gobierno segun un piñata, cu e mes a dicidi di dal kibra, pone tur su dos man bou di dje y a gara loke cu e tabata kier manera infrastructura ya cu tur hende sa kico ta pasando eynan.
El a pone tur su hendenan sinta bou di e piñata y nan a pasa man pa tur loke nan tin pa coy y patras a keda e dos popchinan cu a keda cu solamente 3% di tur loke tabatin den e piñata.
Pues si tabatin tres mangel den e piñata, Geoffrey Wever ta haya tres mangel, Ursell Arends “Nos no ta Nan” tambe a haya tres mangel y tur otro cos a bay pa Evelyn y su hendenan.
Increibel loke ta pasando caminda ta bay forma un gobierno caminda tres minister tin tur e carteranan di e gobernacion, anto tin e otronan cu ta manera un appendix cu no tin nada pa haci.
Tur esaki ta pasando anto awor ta pueblo Evelyn kier convence cu e tin cu tuma medida, e mesun lider di MEP cu a yega di sigura pueblo cu e lo no tuma medida y a sigura pueblo cu cada minister menos, ta nifica cu lo spaar 50 miyon florin pero awor kico pueblo ta mira, cu pa compinchinan den gobierno tin placa, pa amigo y famianan tin placa pero ta pueblo mes tin cu cubri si nan por of no, e reduccion di 60 miyon den cuido medico.
Sinembargo ainda Evelyn Wever Croes tin chens di manda un di e m inisternan cas y realmente spaar 50 miyon y evita cu pueblo ta bay sufri cu e medidanan riba AZV, ya cu ainda e cambio di e LIM no a wordo aproba den parlamento.
Tin minister den e gabinete actual cu realmente no tin mucho cos pa haci, ya cu Evelyn a split diferente ministerio, pa asina hustifica cu e tin cu nombra ocho minister pero na luga di spaar pa yuda pueblo, e ta prefera di recompensa un partner di coalicion cu practicamente no tin mucho d bisa pa di haci,” Arhtur Dowes di fraccion di AVP a señala.