Normalmente tur aña UNOCA ta organisa plan vacacional cu enfoke riba arte y cultura pa nos muchanan y hobennan durante periodo di vakantie escolar. Despues cu aña pasa a organisa solamente dos workshop pa motibo di e pandemia, UNOCA ta bek cu un siman completo di Arte Activo Kids & Youth Camp tanto na UNOCA como na Scol di Arte. Durante e siman di 11 pa 15 di juli 2022 e camp ta tuma luga na UNOCA y durante e siman di 18 pa 22 di juli 2022 e camp ta tuma luga na Scol di Arte. Parti mainta ta specificamente pa e muchanan di 7 te cu 12 aña y parti atardi ta specificamente pa e hobennan di 13 te cu 18 aña.
E camp aki tin como meta pa stimula participacion activo di mucha y hoben den arte y cultura Arubano, pero tambe pa nan siña conoce diferente disciplina artistico. Sin laga afo, pa nan diberti y entretene nan mes un poco durante e periodo di vakantie. Ambos siman lo ta carga di actividad manera pintamento, cantamento, musica, teatro, baile y hopi mas.
UNOCA semper a percura pa mantene e prijs rasonabel y accesibel pa e mayornan. Pa e motibo aki e costo mara na e camp ta solamente AWG 75,- pa un siman completo. Pues, mucha y hoben ta paga e mesun prijs. E prijs ta encera material, cos di come y cos di bebe.
Pa por participa na e camp, mayornan mester inscribi nan yiu(nan) via e link publica riba e pagina di facebook di UNOCA, cu ta UNOCA Aruba.
E forma di pago ta sea via transferencia bancario of por pasa libremente na UNOCA durante orario di oficina, 8:30 di mainta te cu 4’or di atardi.
Ultimo dia pa inscribi ta 8 di juli 2022. Ta di remarca si cu inscripcion pa e grupo di mucha parti mainta na UNOCA a cera.
Pa mas informacion, por tuma contacto cu UNOCA libremente na 583-5681 of por manda un e-mail na general@unocaruba.org
Mayornan, no perde tempo! Scoge e localidad cu bo ta desea di manda bo yiu(nan), sea UNOCA of Scol di Arte, y inscribi awe mes, pasobra cupo ta limita!
