Pa hopi tempo un amigo deportivo a cana riba e mesun sapatonan di hike di bon calidad. Nan tawata sinta bon, tawata apropia pa tur tereno, a proteha su enkelnan y e suelanan tawata resisti cualke obheto skerpi. Pero segun tempo a pasa, e sapatonan a bira mas rigido y inconfortable. E suelanan a bira asina fini cu el a sinti cada piedra y sumpiña. Y ora e no por a nenga mas cu nan tawata causa mas daño cu placer, el a dicidi cu dolor den su curason pa despedi di nan y cumpra sapato nobo. Esakinan a cumpli miho cu su deseonan.
Alternativa
Di mes esaki no ta conta solamente pa sapato. Pa tanto otro asunto sa pasa cu si nan no ta funcshona debidamente (mas) y cu posiblemente tin miho alternativa, ta mas sensato pa cuminsa cu algo nobo, maske con dificil emocionalmente. Esey ta conta pa paña, auto, e sistema di enseñansa y tambe pa partido politico. Si despues di purba varios año a sali na cla cu e/nan no ta funcshona (mas) como debe ser, y mas bien (t)a causa daño grandi na comunidad, ta bira mas cu tempo pa busca alternativa.
Imagen general
Desde comienso di añanan ’90 di siglo pasa, specialmente e dos partidonan grandi cu alternativamente tawata responsabel pa gobernashon di Aruba, a practica politica, c.q. hiba gobernashon di tal forma cu a viola e criterianan di bon gobernashon structuralmente. Tawata trata e.o. di e siguiente caracteristicanan:
- Structuralmente a viola ley (p.e. Constitushon, Ordenansa di Contabilidad)
- Structuralmente a neglisha e criterianan di bon gobernashon (p.e. transparencia, un administrashon / maneho financiero drechi y nunca a responsabilisa e maneho financiero, p.e. pa medio di Cuenta anual)
- Structuralmente a neglisha advertencia/recomendashon (p.e. di RvA, ARA, SER, KvK, CBA, IMF)
- Structuralmente a neglisha e consecuencianan financiero di maneho (debe y interes gigantesco)
- Structuralmente a marginalisa e sistema di checks & balances
- Indiferencia structural pa bienestar di comunidad (no a cumpli cu e ‘obligashon di cuido social’)
- Enfoke structural riba e interes personal y di partido
- Aprobashon structural di parlamento manso pa (mal) maneho
Consecuencia
Tur dos partido grandi a haci nan mes culpabel na e caracteristicanan aki mientras cu riba dje – un mas cu otro- sa viola e normanan di integridad (cu consecuencia di persecushon penal). Di e manera aki, structuralmente a viola e estado di derecho, mescos cu e sostenibilidad financiero di autonomia. En realidad, riba tur dos tereno tawata trata di minamento sistematico.
A base di lo anterior por deduci cu e dos partidonan politico a abusa grandemente di nan poder: cu nombrashon inecesario/ilegitimo di personal, e aparente implementashon deficiente intenshonal di tecnologia efectivo pa baha gasto y mehora funcshonamento di gobernashon; e manera dudoso cu a trata proyecto costoso di gobierno (incluso e destaho deficiente y e falta di mantenshon!); e negligencia di e deber di cuido social di gobierno, tur esaki cu consecuencia financiero y social-economico serio pa Aruba. Cu tur e actonan ilegitimo y structural aki, a comete un inhusticia grandi pa cu comunidad.
Experencia gubernamental of ‘stagiare’?
Asina mes, durante e campaña politico actual, e ‘tradicionalistanan’ ta mustra especialmente riba nan ‘experencia gubernamental’. Segun nan, e partidonan nobo cu ‘politico sin experencia’ mester pasa den un periode di aprendisahe, den caso cu nan haya e responsabilidad pa goberna. Pero mester ta cla cu e experencia gubernamental di esnan ‘bakia’ cu a hiba Aruba practicamente pa un bancarota cu fayo grandi riba hopi tereno, no ta un opshon aceptable. Pesey ta mas na su luga pa acudi na ‘stagiares’ cu lo por haci un limpiesa total y lo por ehecuta concretamente e reformanan cu a neglisha ya caba pa decada y hustamente a keda blokea pa partido cu otro interes cu esun general. Ademas ta parce cu e ‘stagiaresnan’ ta mas inclina pa duna un contenido positivo na e relashonnan den Reino.
Responsabilidad di ciudadano y participashon di comunidad
Mester ta cla tambe cu no ta solamente politico y partido politico cu mester reforma pero tambe ciudadano y henter comunidad. Pasobra no tawata solamente ‘politica’ cu a malcomporta su mes. Ciudadano comun y coriente tambe, mescos cu comerciante, cu sa exigi privilegio exorbitante, ta mesun culpabel na exceso cu al fin y al cabo por hiba na -por ehempel- corupshon. Pesey tambe ta boga den e Masterplan di e gobierno di coalishon actual pa un campaña di concientisashon intensivo pa mustra ciudadano riba e consecuencianan negativo di patronahe politico. Ciudadano tambe mester siña cu nan responsabilidad politico no ta cuminsa y di biaha ta caba cu e momento di tira nan voto na elecshon. Pasobra partido nobo (‘stagiare’) tambe no por duna ningun garantia cu no la actua di mala fe. E unico manera pa reduci e riesgo aki ta pa keda alerta como (organisashon di) ciudadano pa cu e funcshonamento drechi di gobernante y parlamentario. Por logra esey entre otro dor di duna comunidad mas participashon den e maneho general di pais, entre otro pa medio di e instrumentonan di panel di ciudadano y referendum.
