E critica principal cu mi sa haya di ‘politica’ ta cu mi ta considera tur politico igual. Tanto AVP-ista como MEP-ista ta sinti nan mes ofendi, pasobra segun nan ‘e otro’ ta hopi pio. Ademas, varios ta sinti nan mes personalmente agredi, mientras cu den nan wowo esey no ta corecto. Den esey nan ta puntra nan mes for di unda mi ta saca tur informashon. Finalmente algun ta acusa’mi cu, pa motibo di mi articulonan, mi lo ta contra Aruba.
Tur dos mescos?
Manera por deduci di practicamente tur mi articulonan, tanto AVP como MEP a haci nan mes culpabel na malgobernashon structural durante decada. Tur dos a comete patronahe politico riba escala grandi, tawata responsabel pa administrashon financiero sistematicamente deficiente y pa ‘proyecto dudoso’. Pues, en cuanto calidad, practicamente no tawatin casi diferencia. Pero sí en cuanto cantidad. AVP ta responsabel pa 75% (3/4) di e debe nashonal y consecuentemente MEP pa ‘solamente’ 25% (1/4). Riba dje ta resulta for di un analisis di varios rapport di ‘proyecto dudoso’ cu AVP tin hopi mas riba su cuenta compara cu MEP. Pero…manera den e caso cu un ciudadano ta horta Afl. 50.000 y e otro Afl. 5.000, hues ta sentencia tur dos pa ladronicia!
E sapato no ta pa tur hende bisti…
Normalmente (excepto caso excepshonal) mi no ta comenta tocante persona, sino mi ta enfoca riba ‘gobierno’ y ‘partido politico’, mescos cu nos institutonan sa haci. Pues, si mi expone cu un ‘gobierno’ a hiba un malgobernashon, ta bon posibel cu ministro individual a haci tur nan esfuerso pa hiba un maneho positivo. Asina ta conoci cu varios ministro di finansas kier a mehora situashon, pero no por a contraaresta colega cu otro ‘intenshon/plan’. Y sigur (tawa)tin ministro integro, di cual asta a nombra un como gobernador cu aprobashon general. Pero lamentablemente nan tawatin poco influencia riba e trend general negativo.
E fuentenan
Pa esnan cu sa lesa rapport di SER, Conseho Consultativo, Controlaria general, CAft, Banco Central, IMF y yen di comishon cu gobierno mes a instala, tur locual mi ta skirbi, ta reconocible. E base di gran mayoria locual mi ta skirbi, ta sali for di e rapportnan aki, aki aya dorna cu informashon di funcionario (oficial y integro) cu experticio al caso. Esey ta por ehempel den caso cu mi mes tin mester di mas splicashon. Cu otro palabra, esnan cu seriamente profundisa nan mes den e rapportnan menshona, lo saca exactamente mesun conclushon. Como cu e informashon aki, por lo general den idioma diplomatico, ta describi den miles di pagina y decenas di rapport, pa comodidad di tur hende mi a recapitula e informashoon- y conclushonnan principal den 6 rapport tematico den idioma cla y cu referencia extenso na e fuentenan.
Anti-Aruba?
Hopi hende ta experencia critica como un atake personal di parti di oponente. Y sa interpreta (manipula!) critica contra gobierno di Aruba como critica contra Aruba. Mayoria di biaha no tin e minimo reflecshon tocante e posibilidad cu e critica lo por ta na su luga y cu di berdad tin motibo (urgente) pa cambia situashon. E echo cu e coalishon actual tin como su metanan principal: bon gobernashon, transparencia y integridad, ta demostra cu mi critica durante tur e añanan, tawata na su luga. Pasobra tur ta tema cu mi a atende durante decada. Tambe e reconocimento den e recien ‘Nota Hervormingen Aruba’ di juni 2020, cu “Aruba ta conciente cu no por sigui postpone reforma y cu mester reforma riba escala grandi”. Esey ta trece na cla cu no ta esun/esnan cu durante decada (t)a critica gobierno y ta boga pa reforma ta ‘anti-Aruba’, sino hustamente e gobernantenan cu a tira tur advertencia y recomendashon pa mehorashon den bari sushi. ESEYNAN ta e hendenan cu a hinca Aruba sin misericordia den un abismo.
Conclushon
No ta nada asombroso cu, a base di tur e conocemento adkiri, di ningun manera mi no ta kere (mas) den e abilidad di ‘politica di partido’ pa e mes mehora su calidad drasticamente den un termino razonable na beneficio di comunidad. Consecuentemente mi conclushon cu mester reforma nos sistema politico drasticamente. Pesey mi a lansa un modelo democratico nobo den cual e ‘politica di partido’ no por sigui limita e Arubianonan cu potencial (cu sigur tin!). Naturalmente tambe tin otro posibilidad cu lo por expone den un dialogo nashonal. Pero sigui riba e mesun caminda en todo caso ta un opshon. E ora ey Hulanda lo mester sigui ranca nos na nos orea pa tene nos atenshon n’e les.
