Esaki tawata titulo di e revista briyante di propaganda ‘Aruba Dushi Tera’ di gobierno di AVP na juni 2015. Segun e ex-secretario di Finansas prof. Dr. Willem Vermeend, esakinan ta e caracteristicanan di e sistema di impuesto nobo cu Aruba lo introduci dentro di dos aña: “Lo remplasa e actual sistema anticua pa un sistema comprendible y eficiente na unda e enfoke ta bin riba impuesto indirecto mientras lo digitalisa e ehecushon mas cu ta posibel”.
Meta
Segun e articulo e proposito tawata “pa diseña un sistema cu ta enfoca na cobra mas lihe y mas efectivo (‘compliance’) y cu lo yuda stimula economia dor di haci Aruba mas atractivo pa invershon (tambe for di exterior) den actividad duradero”. Den esey ‘omzetbelasting’, BBO y impuesto di importashon lo desparce, mescos cu impuesto di number di auto y e sistema complica di contribushon di dunador di trabou y empleado, dispensashon y restitushon. Anke no a establece tarifa ainda pa e sistema nobo di impuesto, no lo aumenta e peso total pa e pagadornan di impuesto.
Bari for di mesa
A pesar di e tantisimo bentahanan cu a menciona y e propaganda cu a hiba, e ministro-presidente di AVP di e tempo ey a bari e producto final, na cual su ‘zakenminister’ di finansas tambe a aporta intensivamente, sin mas for di mesa. Esey tawata hopi straño: ya caba for di principio di añanan ’90 di siglo pasa, instancia di Aruba y internacional a adverti gobierno consecutivo di e desbentahanan di e sistema di impuesto anticua y complica. Pa motivo di e cantidad di ‘loopholes’ (buraco), e posibilidad pa evadi impuesto tawata relativamente simpel. Consecuentemente Aruba tawata perde hopi entrada di impuesto. Pesey Aruba lo ricibi mas entrada cu e sistema nobo, tambe pasobra turista y ilegal lo aporta miho. Pues, pa hopi hende tawata un misterio pakico e prome ministro a scohe na ultimo momento pa sigui cu e sistema di impuesto anticua, cu pa mayoria parti y den varios aspecto tawata perhudicial pa Aruba.
Ahaa!
Comunidad di Aruba NUNCA a ricibi un splicashon cla di parti di gobierno pa e cambio inespera aki. Segun un ex-funcionario di impuesto mester busca motibo di esaki den e preshon fuerte di financiador di campaña pa no efectua e reforma di impuesto. Pasobra e posibilidad pa evadi impuesto lo bira hopi mas dificil. Si lo reforma tòch, esey lo por a trece cu n’e cu nan lo reduci nan aporte na e caha di campaña drasticamente of asta par’e. Esey lo ta un sacrificio mucho grandi pa e partido. Pa Pais Aruba esey a nifica cu e por a yama ayoo na e miyones di florin na entrada extra di impuesto.
Triki di desaparishon
Si esaki di berdad ta e motibo, e no tawata e unico manera cu partido na poder a kita placa for di comunidad di Aruba. Den un combersashon anterior, hopi aña prome, mi a comenta di ta contento cu e gobierno nobo a cumpra computer y programa nobo pa oficina di impuesto. Segun otro funcionario esey tambe tawatin un motibo simpel: ora di transferi e datonan di e sistema bieu pa esun nobo, facilmente por a laga somenta e cobransanan di impuesto di financiador y miembro importante di partido. Den esey tambe por a trata di suma substancial.
Investigashon
Pa e motibonan aki y hopi otro mas a bira mas cu tempo pa hiba un investigashon profundo na e berdad di esaki. Pasobra esaki lo por nifica cu corupshon politico den nos pais lo ta hopi sistematico y lo tuma luga di varios manera. E pregunta ta si investigashon y mehorashon di esaki lo por tuma luga cu e mesun partido(nan) ‘interesa’ na poder. Den e contexto aki e pregunta tambe ta kico ta preveni e gobierno di coalishon actual pa concretisa e recomendashon cu tanto IMF y Hulanda ta ripiti durante hopi aña caba pa introduci BTW (VAT) lo mas pronto posibel (1 di januari 2021). Pasobra e ‘propio’ adaptashonnan cu a tuma luga te cu awor no a hiba na aumento significativo di e confiansa…