MAN-PIN ta sigui e desaroyonan rondó di presensia di arma di kandela bou di hóbennan
na Kòrsou masha di aserka. E ta un fuente di inseguridat nashonal i ta kousa di
preokupashon grandi den komunidat. Un preokupashon ku MAN-PIN ta tuma hopi na
serio.
For di inisio di aña 2024 nos di MAN-PIN a tuma nota ku gabinete Pisas II ta hiba un
maneho di tolerá hopi tipo di violashon di lei ku ta tuma lugá den nos komunidat. Esaki
no ta straño paso dirigentenan di e gobièrnu aki a demostrá durante último 3 aña i mei
ku nan ta pará mas na banda di esnan ku no ta tene nan mes na regla den nos pais.
Asta por tribi di bisa ku gobièrnu ta sostené e hendenan i/òf aktonan aki.
Den práktika ta mira ku durante masha hopi akshon polisial ta konstatá ku
siudadanonan, inkluso hóbennan, tin diferente tipo di arma den nan poder. Un
situashon alarmante sigur ora tuma nota ku polis ta detené hopi di e hóbennan ku ta
haña nan mes den e situashon aki. Di otro banda gobièrnu den persona di minister di
Hustisia no ta sali defendé trahadónan di nos kadena hudisial, ku tei pa protehá
siudadanonan den komunidat.
Asta ora tin atakenan pisá kontra di Ministerio Públiko i kontra agentenan polisial
gobièrnu ta keda ketu. Dirigentenan di e aktual gobièrnu ta bai asina leu pa propaganda
i sostené manifestashon kontra di un proseso hudisial ku ta tumando lugá den nos
komunidat.
MAN-PIN ta sumamente preokupá ku e ehèmpel ku komunidat ta haña for di e
aktuashon di gobernantenan i konsekuentemente e rumbo ku pais ta bai aden. Mester
bini un paro na desaroyo negativo aki i tuma akshon serio pa protehá komunidat. Pa e
motibu aki MAN-PIN ta sostené proyektonan pa alsa vigilansia durante fin dia aña i
tambe durante periodonan di fiesta 100 porshento i ta konvensí ku gobièrnu mester
sòru pa tin un grado haltu di protekshon. No por ta asina ku ta gobièrnu ta esun ku ta
faya i duna e ehèmpel robes na komunidat.
Arma den nos comunidad ta un “TIME BOM”
