Durante e reunion publico cu a tuma luga siman pasa riba e tema di criminalidad bou di hobennan, Parlamentario Alvin Molina a presenta dos mocion, cu mester reforsa e maneho cu e Minister di Husticia ta hiba.
Segun Molina; pa cuminsa mi a tuma nota cu tabatin critica pe hecho cu mi persona y coleganan no a vota na fabor di e mocion di oposicion (AVP) riba combatimento di criminalidad. E tin un splicacion simpel. Mi persona a entrega un mocion parcialmente similar cu esun di AVP, cu ta encera un proyecto pa entrega arma. Sinembargo, punto number 2 di e mocion di AVP ta formula un peticion cu den mi opinion, ta un trabou legislativo cu mester wordo haci door di Parlamento y no door di Gobierno. Esey ta e motibo cu mi persona y mi coleganan a vota contra di e mocion aki. Ta trata akinan di un discusion riba aumento di castigo.
Mi ta presidi e comision di husticia y mi lo percura pa e tema di aumento di castigo bini mas lihe posibel na mesa di discusion. Pa cu esaki lo yama encuentro cu ‘stakeholders’ pa crea un acuerdo nacional di kico ta posibel riba aumento di castigo pa casonan pisa manera asesinato. ‘Mi no ta contra e topico aki pero simplemente e punto ey ta algo cu ta regarda e organo mas halto di nos pais cu ta Parlamento,’ Molina a enfatisa.
E Parlamentario a sigui bisa; mi ta kere cu combatimento di criminalidad ta responsabilidad di cada persona den e comunidad aki. Un bon punto di comienso ta Polisnan di Bario. P’ e motibo ey mi a presenta un mocion pa Polis di Bario haya e atencion necesario. Cu esaki mi kiermen e personal mester ricibi e cursonan como tambe haya e materialnan necesario pa asina por atende specialmente cu e problemanan social cu tin cerca e hobennan.
Polis di Bario por bay hunga un rol importante unda ta crea un ambiente sano den e bario pa hobennan. Na momento cu tin e problema domina na su raiz, eventualmente varios tipo di criminalidad aki bou di hobennan lo baha. Cu mi ‘background’ policial mi a mira di cerca e dolor cu hobennan cu cay den criminalidad ta trece tanto pa nan famia como famia di e victimanan. ‘Nos hendenan por ta sigur cu mi lo lucha pa combati criminalidad principalmente bou di e hobennan’, Molina a finalisa.
