Argentina a titula su mes campeon di mundo despues di a surpasa varios obstaculo riba caminda. E final a wordo disputa via di penalty den un wega dramatico, caminda Argentina practicamente tabata sigur di e titulo ora cu el saca bentaha di 2-0 den prome tempo.
Golnan di Lionel Messi pa penalty y di Di Maria e ekipo tabatin dominio total den e wega pero den di dos tempo, Francia a haci loke e mester a haci, esta di reacciona casi na final di e wega oa cu Mbappe ta anota dos gol den dos minuut di tempo pa manda e partido tempo extra.
Aki un biaha mas Argentina ta saca bentaha cu a mustra decisivo pa medio un biaha mas di Messe pero Mbappe pa medio di un penalty ta logra di empata e partido na 3-3 loke a pone cu tiramento di penalty tabata necesario.
Francia a cuminsa bon cu Mbappe anotando e 1-0 pero mesora Lionel Messi ta empata cu su gol pa e marcado bira 1-1 pero desaster Frances a cuminsa ora cu Coman ta faya su tiro penal y Paulo Dybala pone Argentina dilanti 2-1.
E titulo pa Argentina a cuminsa bira realidad ora cu e Frances, Tchouameni ta faya di dos penalty sigui di su ekipo y mesora Paredes ta practicamente sigura e titulo anotando e 3-1 pa Argentina.
Kolo Muani ta anota porfin pa Francia pa su ekipo keda na bida pero Montiel tampoco a faya y asina e celebracion grandi di Argentina a inicia caminda e gran heroe sin duda tabata e figura di Lionel Messi cu a logra di gana e unico premio cu e no a gana ainda den su carera como futbolista.
Esaki a bira di tres titulo mundial di Argentina y pa Messi ta bira su di dos titulo grandi cu e tabata falta pa gana ya cu na 2021 el a guia su ekipo nacional na e titulo di Copa America y awor ta corona su carera exitoso cu e titulo aki cu tanto el a anhela pero na dos ocasion el a faya den esaki.