Nos tur tin mester di Dios, no tin asunto di hunga profesional, ni tampoco cay den e gara di orguyo
spiritual, ni tampoco sinti cu un ta mas cu otro, pasobra caminda Spirito di Dios ta no tin inferioridad.
Dios ta yama nos pa nos ta humilde den tur situacion, y ora nos por haci un fout nos reconoce, busca
Dios Su cara, y arepenti, y restaura nos intimidad cu Dios.
Sin arepentimento no tin pordon di pica, sin confesion no tin adelanto spiritual,y hasta ora nos no
confesa, nos consenshi y nos mente ta keda afecta, door di falta di pordon y preocupacion cu e
enemigo ta pone riba nos, pesey hopi biaha ora hende tin stress y depresion, arepentimento ta e prome
paso pa liberacion.
Si nos bisa cu nos no a haci pica, nos ta haci’E un gañado y Su palabra no ta den nos (1Juan 1:10).
Si nos bisa cu nos no tin pica, nos ta gaña nos mes, y e berdad no ta den nos ( 1 Juan 1:8).
Si nos bisa cu nos tin comunion cun’E y sinembergo nos ta cana den scuridad, nos ta gaña y no ta
practica e berdad.( 1Juan 1:6)
Si nos confesa nos picanan, E ta fiel y husto pa pordona nos, nos picanan y pa limpia nos di tur
inhusticia.( 1 Juan 1:9).
Den e parabola di e fariseo y e publicano nos ta ripara cu tur dos conoce Dios, e fariseo tabata confia
den su mes y tabata wak otro cu menos precio. E publicano tabata reconoce cu pa drenta serca Dios
mester bini cu un curason arepenti, buscando misericordia di Dios, den tur circumstancia, pasobra e
misericordia di Dios tin tur cos den dje. Y e no tabata pretende di ta bon, pero e a expresa su necesidad
di Dios.( Lesa Lucas 18;9-14).
Arepentimento ta trece nos mas cerca Dios Tata, Cristo Hesus, y e Spirito Santo, orguyo y arogancia
spiritual ta debilita nos comunion cu Dios y ta aleha nos for di e presencia di Dios.
Ora nos humiya nos mes Dios ta halsa nos, pero ora nos ta halsa nos mes Dios ta humiya nos.
No ta cumbini ningun hende pa gaña nada pa haña respaldo di hende, pero ta cumbini tur hende pa
papia berdad y asina wordo respalda door di Dios y den e gracia di Dios.
Señor su palabra ta bisa den Zacarias 1:3:Bolbe serca Mi y pa Mi bolbe serca boso.
Den Santiago of Jacobo 4:7 Señor ta bolbe corda nos: Somete boso na Dios, resisti e diabel y e lo huy
for di boso,hala serca Dios y e lo hala serca boso. Y nos tur tin cu corda cu e prome paso pa hala serca
Dios ta arepentimento.
Den un cas caminda ningun hende ta arepenti, tur dia tin discucion, pasobra nan tur kere cu nan ta bon,
cu nan no tin mester di otro, y e enemigo ta drenta y causa division den famia, pasobra no tin
humildad, y asina falta di pordon ta lanta cabes.
Salmo 139:23-24 ta bisa: Scrudiñami , O Dios, y conose mi curason, purbami y conoce mi pensamento
nan, y mira si tin cualkier caminda di maldad den mi,y guiami riba e caminda eterno.
Repenti anto y comberti, pa boso picanan wordo kita, pa e temponan di refrescamento por bin for di e
presencia di Señor, y pa e por manda Hesus e Cristo, destina pa boso.
Esun cu sconde su picanan lo no prospera,ma esun cu confesa y laga nan lo haña misericordia.(
Proverbionan 28:13).
Sinceramente, Pastor Marcel Balootje.