Archivo Nacional Aruba cu servicio limita pa publico!

Entrante diabierna 17 di februari e servicio cu Archivo Nacional Aruba (ANA) ta brinda na publico, lo ta uno limita. Esaki ta debi cu pa mas cu un siman nos ta confronta fayo den e sistema di airco, cual ta haci cu particularmente merdia den e seccion di servicio pa publico esta e sala di estudio y di exposicion ta hopi calor.

E limitacion di servicio aki ta encera cu parti mainta nos ta duna servicio na publico, pero parti merdia ANA lo ta cera pa publico. Den caso di un emergencia lo por acudi na e porta na banda, ya cu e porta principal lo ta cera.

Pa loke ta trata nos servicio telefonico, esaki ta sigui normal. Pues por yama 5834880, of por manda nos un e-mail na ana@aruba.gov.aw, pa pidi informacion.
Pa esnan cu ta busca informacion e.o. historico por subi e website di “Coleccion Aruba”, di cual ANA ta forma parti di dje. Aki por haya mas informacion historico y general. E coleccion aki ta accesibel riba https://coleccion.aw. Esaki ta e portal mas grandi y accesibel di e herencia documental y audiovisual di Aruba y di
Caribe.

Den e siman venidero tambe e servicio lo ta limita, ya cu e instalacion di aparatonan nobo lo cuminsa pa asina rëestablece e sistema di airco.

Archivo Nacional ta pidi nos usuarionan y publico en general comprension pa e situacion aki. Nos ta desea pueblo di Aruba dushi dianan di Carnaval, celebrando esaki sanamente y sigur!