Diabierna atardi Minister di Turismo y Salud Publico sr. Dangui Oduber tabata presente na airport pa e vuelo inaugural di Arajet cu a yega directamente for di Santo Domingo. Aki e mandatario a duna un discurso chikito caminda e la duna Arajet un caluroso bon bini na pais Aruba. Arajet sigur lo aporta grandemente na Aruba su turismo y duna mas accesibilidad na e ruta entre Aruba y Republica Dominicana na un prijs hopi economico.
Arajet ta bay tin vuelo directo for di Aeropuerto Las Americas 2 biaha pa siman riba dialuna y diabierna. Nan ta opera cu avionnan Boeing 737 max 800 completamente nobo y moderno cu tin un capasidad di 185 asiento. E prijs di vuelo lo cuminsa desde $168 dollar inclui impuesto cu ta un prijs hopi economico. Locual ta remarcabel di e aerolinea nobo aki ta nan plan y tur e rutanan cu nan lo kier habri den Caribe, Latino America y Centro America uzando Santo Domingo como nan hub. Esaki sigur lo beneficia e ruta Aruba tambe y deversifica nos turismo aun mas.
E mandatario a duna di conoce cu semper e la boga pa un desaroyo turistico sostenibel cual Arajet tambe ta para pe. Arajet ta bay inicia su operacionnan cu un flota di 5 avion Boeing 737 Max 800 cu ta avionnan diseña pa cuida e medio ambiente door cu nan ta consumi menos combustibel. Esaki ta conduci cu Arajet tin un gasto di operacion mas abou cu normal cu ta haci posibel cu nan por duna un tarifa economico na nan clientela.
Minister Dangui Oduber a menciona cu su maneho ta basa riba e diversificacion di nos turismo. Ta bay keda enfoca pa sigui sera mas acuerdonan cu diferente otro aerolinea pa sigui aumenta e capasidad nan maximo di asiento pa Aruba. E strategia di recuperacion ta funcionando y e indicadornan pa nos turismo ta fuertisimo.
Minister Dangui Oduber ta yama danki na AAA, specilamente e Airlift Committee, pa logra trece un di e aeroliñanan mas na nos isla. Un danki sigurna Arajet pa duna Aruba su confiansa. Danki na tur persona cu ta involvi den Aruba su turismo, na tur esnan cu ta duna e tremendo servicio na nos bishitantenan.
Ban sigui avansa hunto como pais pa asina Aruba por keda serca di 100 porciento di recuperacion di nos turismo compara cu aña 2019.
