Diabierna anochi tabatin un momento di celebracion y reconocemento pa varios empleado cu a cumpli sea 30 of 20 aña di servicio cu MetaCorp. E celebracion a tuma luga na Balashi Beergarden den presencia di famia, amigo y e ehecutivonan di e compania netamente Arubiano cu mas aña continuo di existencia. Ta trata aki di empleadonan cu ta traha na EcoTech y na APEX.
Carlos Suarez
Carlos Suarez a cumpli 30 aña di servicio cu APEX, cu antes tabata ATCO Arub. E ta traha den e seccion di garashi. Carlos Suarez a cumisa traha cu ATCO Aruba desde 1 di juni di aña 1993.
Wendell Bennett a tuma Carlos den servicio como mecanico. Durante su añanan di servicio, Suarez a bira un mecanico specialisa riba diesel y como tal ta masha crucial den mantencion di e ekipo y vehiculonan di e compania.
Tini Thielman
Tini Thielman a cuminsa traha na Maduro Travel dia prome di juli 1993. Tini a traha na e diferente branchenan di Maduro Travel y alabes den diferente departamento. Tini a cuminsa na Maduro Travel na e branche na Playa como Sales Clerk, pero despues di un periodo masha cortico a mand’e pa asisti na e branche na San Nicolas. Den su trayectoria laboral Tini a traha tambe durante shete aña na Mariniers Kazerne como un travel agent special pa kazerne so. Un periodo cu e ta recorda cu hopi bon experiencia. Dia prome di januari di aña 2021 a pas’e pa Ecotech como accounting officer unda cu Tini a cuminsa traha den Accounts Receivable y awo ta trahando den e departamento di invoicing.
Laida Eramus
Adelaida Carmen Erasmus, na trabou tur conoc’e como Laida. El a cuminsa traha dia 16 di juni di aña 2003 den e funcion di sales. Actualmente Laida ta trahando cu e team di dispatcher na Ecotech Aruba. Laida su coleganan tin un aprecio pa su trabou mirando cu e ta puntual, critico y comprometi.
Gwendoline Tromp
Gwendoline Tromp a cuminsa traha dia 2 mei di aña 2003 na Associated Transport Co. (ATCO) como administrative assistant den e departamento di concret y despues a pasa pa e departamento di accounting como invoicing clerk. Na aña 2010 Gwendoline a bay traha cu ATCO Concrete (awor APEX), caminda el a eherce diferente funcion den e departamento di accounting. Aki Gwendoline a traha como invoicing clerk, kas controlle y accounts payable. Na aña 2021 a pasa Gwendoline pa ATCO Aruba/Ecotech unda ta trahando como accounts payable officer. Gwendoline semper a haci su trabou manera debe ser y ta un persona cu semper a coopera y ta yuda te unda cu e por.
Jairo Dania
Jairo Dania a cuminsa su trabou cu e famia di Ecotech dia 29 di april di aña 2003. Jairo a cuminsa como helper y durante e añanan el a progresa riba diferente areanan di trabou.
Actualmente Jairo ta e chauffeur responsabel pa ruta di Noord. Team di EcoTech ta contento cu Jairo su trabou. E ta responsabel, critico y leal.
Gerencia ta agradecido
MetaCorp y e companianan APEX como tambe Ecotech ta felicita e trahadonan y gradici nan cu nan aniversario. Un logro di 20 of 30 aniversario sigur ta algo remarcabel y ta refleha e dedicacion y compromiso pa cu nan trabou. E contribucion di cada un durante e añanan sigur a aporta na un un impacto positivo pa e companianan. Gerencia di MetaCorp ta duna danki na cada un un pa e trabou duro y lealtad na e companianan.
Tocante MetaCorp
MetaCorp ta existi desde aña 1920 caba y a start den negoshi di cine. Cu apertura di Lago a cuminsa cu E. De Veer Transport cu awendia yama ATCO cu despues a expande tambe den APEX y Ecotech. Despues di dos guera mundial a cumpra e planta di Coca Cola y asina a inicia Tropical Bottling, cu na caminda a expande tambe den Brouwerij Nacional Balashi. E compania a sigui desaroya cu apertura di New York Laundry y EcoGas.
MetaCorp ta e empresa comercial mas bieu na Aruba cu mas di 100 aña di existencia continuo. Cu un fundeshi solido, cu un cultura di compania basa riba principionan di inversionnan duradero y kere den empleadonan, MetaCorp awendia ta cla pa e siguiente 100 añanan di progreso, cu talento manera Eddie de Veer y Guus Slabbekoorn na cabes di e compania.
Tocante APEX
E trayectoria di ATCO a inicia door di cierre di Lago ora a transforma e economia di Aruba y a basa riba e sector turistico. Na 1985, a cuminsa cu e prome proyecto cu un planta portatil chikito di concret y desde e tempo aki a evoluciona pa ta e planta di concret di mas grandi riba nos isla y di mas moderno den nos region.
A expande su actividadnan cu produccion di bloki cu awendia por produci mas di 5.000 bloki pa ora y tambe a expande cu produccion di pavers. Ta certifica e proceso- y materialnan segun standard internacional pa por garantisa calidad superior na su clientenan. A bay for di importacion di saco di cement chikito y saco grandi, pa bulk cement den silo cu ta duna e consistencia rekeri den su recetanan. Tambe nan ta importado y rebendedo di santo y piedra y asina ofrece e mercado calidad y consistencia. Nan ta e pionero riba nos isla den procesa desperdicio di construccion, asina ofeciendo Aruba un solucion sostenibel. Na 2021, APEX a anuncia di tin un planta pa empaketa cement fresco aki na Aruba mes.
Aña 2022, a marca un paso importante den evolucion di e compania na unda a anuncia e imagen nobo y cambio di nomber di ATCO Concrete Products NV pa APEX. Alabes a anuncia nan innovacion di mas recien cu ta nan propio planta pa produci Hollow Core. APEX, Calidad Superior!
Tocante Ecotech
EcoTech ta existi desde aña 1985 caba y ta traha pa sirbi mas di 7500 mil clientenan. Cu un ekipo di mas o menos 70 trahado, EcoTech ta responsabel pa mas di 60% di tur sushi di nos isla, di cual e mayoria ta comercial y di clientenan residencial. E compania ta conoci pa su servicio sin igual y su vision innovativo y duradero pa maneha desperdicio riba nos isla.
1 comment
[…] Source link […]